FEDA û DAKB’ê daxuyaniyeke nivîskî dan û ev yek anîn ziman: ‘’Ji Berxwedana Koçgiriyê heya niha ku yek ji xala girîng a dîroka Kurd û Elewiyan e, lêgerîna heqîqetê berdewam dike. Ev berxwedana ku di navbera salên 1920-1921’an de ji aliyê Kurdên Elewî yên li ser xeta Sêwas, Erzingan û Dêrsimê dijîn ve hate destpêkirin; bes ne serhildanek bû di heman demê de îfadeya rêya me, rizaya me, rûmeta me û daxwaza jiyana azad e.’’
Dewama daxuyaniyê bi vî rengî ye:
‘’Elîşêr Efendî û Zarîfe Xatûn ku yek ji pêşengên berxwedanê ne, ji bo rûmet, bawerî û daxwaza jiyana azad a gel têkoşiyane; bi sekna xwe nîşan dane ku rêya Elewîtiyê çawa bi baweriya heqîqet, rizabûn û edaletê re digihîjin hevûdu.
Dema ku em weke Federasyona Elewiyan a Demokratîk (FEDA) û Yekîtiya Jinên Elewî yên Demokratîk (DAKB) Berxwedana Koçgiryê bi bîr tînin, em bes êşên di paşerojê de hatine kişandin bi bîr naînin. Di heman demê de em diyar dikin ku divê rûbirûbûna bi heqîqetê re pêk were û ji bo ku ev êş careke rû nedin dersên hewce werin standin. Ji ber ku cewhera rêya Elewîtiyê li ser rizabûn, edalet û heqîqetê ye.
Di 105’emîn salvegera Berxwedana Koçgiriyê de em li hemberî bîranîna kesên ku li Koçgiryê ber bi koça dawîn ve çûne bi rêzdarî bejna xwe ditewînin; dubare diyar dikin ku mîrateya wan hemwelatîbûna wekhev, azadiya baweriyê, edalet û aşitî ye.
Me Koçgirî ji bîr nekiriye û em ji bîr nakin.’’
