Bi pêşniyara Rêber Apo re li Meclîsa Tirkiyeyê komîsyonek hate avakirin û ji bo amadekariya qanûnên têkildarî pêvajoya nû dest bi kar kir. DEM Partî bi pênc endaman li komîsyonê tê temsîlkirin. Yek ji van endaman jî Parlamenterê Stenbolê yê DEM Partiyê Celal Firat e ku pîrekî Elewiyan e.
Celal Firat li ser bendewariya civaka Elewî ya ji komîsyonê axivî.
Firat diyar kir ku DEM Partî wê di komîsyonê de di serî de li ser pirsgirêka Kurd li ser hemû pirsgirêkên girîng ên Tirkiyeyê biaxive û pirsgirêkên civaka Elewî jî di komîsyonê de nîqaş bike.
Parlamenter Celal Firat got, “DEM Partî ne tenê ji komîsyonê, her wiha ji gelên Tirkiyeyê jî bendewariyên xwe hene: Tevkariyê li pêvajoya aştiyê bikin. Gelek hêviyên me ji vê komîsyonê hene. Ya ku şertê yekane yê demokrasiyê ava bike ev komîsyon e.
Li Meclîsê bi taybetî jî Partiya Gel a Komarê digot, ‘Bînin meclîsê’. Vaye li meclîsê ye. Hêvî û bendewariya me ew e ku her kes, her partiyeke siyasî nêrînên xwe di çarçoveyeke azad de bînin ziman, di serî de li ser meseleya Kurd li ser hemû meseleyan biaxivin û çareseriyê hilberînin. Lê belê bendewariya me ya herî mezin jî aştiya civakî ye.
Firat ragihand ku DEM Partî wê pirsgirêkên di civînên gel ên li ser pêvajoyê hatin bilêvkirin li komîsyonê bîne ziman û işaret bi bêbaweriya gelê Kurd a ji ber polîtîkayên berê yên dewletê kir.
Yek ji mijarên sereke yên ku Firat destnîşan kir ku wê bixin rojeva komîsyonê jî pirsgirêkên li girtîgehan e û destnîşan kir ku di vê mijarê de meclîs bi bangekê dikare bicive.
Celal Firat diyar kir ku li gel meseleya Kurd li Tirkiyeyê her wiha pirsgirêkeke demokratîkbûnê heye û got, “Pirsgirêka Elewiyan, bindestan, meseleya jinan heye. Bi dehan mesele hene, pirsgirêkên kedkaran, yên derdorên cuda hene. Bêguman divê mirov hemû pirsgirêkan nexin stuyê komîsyonê, lê belê meseleyên sereke; li ser pirsgirêka Kurd û pirsgirêka Elewiyan divê komîsyon xwedî gotin be.
Li ser komîsyonê berpirsyariyên gelekî mezin hene, hêvîdarim wê haya xwe ji vê hebe. Li wê derê hemû hevalên me, ji kîjan partiyê dibin bila bibin divê li dora wê maseyê mekanîzmayên welê xurt bikin ku karibin li ser hemû pirsgirêkan biaxivin. Ev yek wê ji bo Tirkiyeyê, ji bo pejirandina demokratîkbûna Tirkiyeyê bibe hêvî. Ez ji komîsyonê bi hêvî me.”
Parlamenterê DEM Partiyê Celal Firat bi bîr xist ku ew weke Pîrekî Elewî di nava komîsyonê de ye, lewma ev yek ji bo civaka Elewî gelekî cidî ye, bersiva li propagandayên reşkirinê yên li ser Elewiyan e û got, “Ez şexsekî xoceyê Îmam Riza me, bi salan li nava cemxaneyan mezin bûm û pîrê Pîr Garîp im. Civaka Elewî civakeke mezin e. Niha li Tirkiyeyê medyayeke hawiz heye, medyayeke muxalîf jî heye. Lê bi xemgînî dibêjim, ew jî wî zimanî bi kar tînin. Ji yên din sûd wergirtine û propagandayeke gelekî nebaş dikin. Mejiyekî welê didin pêş, weke ku ‘me bi AKP-MHP’ê re li hev kirine, em ê bi wan re bimeşin’ nêzîk dibin.
Bêguman bi giranî Elewiyên ku di nava CHP’ê de ne bi vî çavî lê dinihêrin; Elewiyên di nava DEM Partiyê de cuda lê dinihêrin, pêvajoyê fêhm dikin, ji ber ku medyaya me dişopînin. Medya Tevgera Azadiyê ya Kurd bi xurtî dişopînin.
Weke Pîrekî Elewî em gelek rexneyan werdigirin. Li her cihê ku em diçin, li ser vê meseleyê bi me re diaxivin û dema ku em diaxivin îqna dibin.”
Celal Firat destnîşan kir ku bendewariya Elewiyan a ji komîsyonê ew e ku li ser bingeha welatîbûna wekhev bêne naskirin û got, “Bendewariyên Elewiyan hene. Di çarçoveya naskirina cemxaneyan weke îbadetxaneyê, bendewariyên xwe hene. Li hemberî Elewiyan bi dersên olî yên ji neçarî polîtîkayeke asîmîlasyonê ya mezin tê meşandin. Mejiyekî dewletê heye ku hewl dide Elewiyê xwe biafirîne û li hemberî vê jî nerazîbûneke mezin heye. Dema ku li Poturgeyê bûm hîn bûm ku ji bo komîsyonê hatime pêşniyarkirin. Mirovên li wê derê û bi sedan hevalên me anîn ziman ku ew vê yekê hêja dibînin. Rêxistinên me yên Elewî jî wê daxuyaniyê bidin.”
Parlamenter Celal Firat diyar kir ku di serî de pirsgirêka Kurd ji bo çareseriya pirsgirêka Elewî ya li ser bingeha welatîbûna wekhev, li komîsyonê çi pêwîst be wê bikin.
