69 gerîlayên HPG û YJA Starê yên di demên cuda de şehîd bûn û şehadeta wan nû hate ragihandin, 21’ê Cotmehê li Kobanê bi merasîmeke girseyî hatin bîranîn.
Îro jî bi tevlîbûna gaziyan xelkê Kobanê serdana malbatên şehîdan dikin. Di serdana malbata şehîd Şahîn Kobanê de li ser navê gaziyan Mihemed Îsmaîl Elî yê weke Xalê Simo tê naskirin axivî.
Xalê Simo di destpêka axaftina xwe ji Rêber Apo, gelê Kurd û malbatê re sersaxî xwest û got, “Weke hevalên gazî em xwe deyndarên şehîdan dibînin. Em ê şopdarên rêya şehîdan bin. Heya dilopek xwîn di canê me de hebe, em ked û doza wan ji bîr nakin. Em ê xwedî li şehîdên xwe derkevin.”
Di serdana malbata şehîd Welat de jî Hevserokê Saziya Malbatên şehîdan a bajarê Kobanê Mistefa Êto axivî û got, “Em ê çi jî bêjin em ê bi temamî nikaribin şehîdan terîf bikin. Ji bo gelê xwe ji tarîtiyê rizgar bikin, şehîd canê xwe feda kirin. Em ê timî li pey doza şehîdên xwe bin.”
Bavê şehîd Welat Kobanê jî di axaftina xwe ji bo serdanê spasdariyên xwe diyar kir û got, “We êş û barê me parve kir. Xwedê ji we razî be. Şehîd namirin.”
Serdana malbatan dewam dike.
