Gaziyên şer ên herêma Firatê li hola Meclisa Malbatên Şehîdan a bajarê Kobanê hatin gel hev û daxuyaniyek da. Endamê Saziya Gaziyên Şer Rêber Îsmaîl daxuyanî xwend.
Di daxuyaniyê de hate gotin: “Em gaziyên şer ên herêma Firatê ya Rojavayê Kurdistanê, radigihînin ku ji destpêka vê salê heta niha û piştî şerê ku li ser herêma me hate ferzkirin, hîn jî şerekî taybet, polîtîkayên asîmîlasyonê û nêzîkatiyên komploger têne kirin. Çi rêyên di bin navê ‘aştî û civaka demokratîk’ de li Bakurê Kurdistanê û Tirkiyeyê û di bin navê ‘entegrasyona demokratîk’ de li Rojavayê Kurdistanê û Sûriyeyê hebin jî, siyaseta ku di pratîkê de tê kirin ji vê rastiyê dûr e. Ev yek guman û tirsên me zêde dike.
Bê guman armanca sereke ya van polîtîkayan ew e ku çareseriya dîrokî ya ku Rêber Apo wek projeyek stratejîk pêşniyar kiriye, ji naveroka wê vala bikin. Tevî hemû gavên bingehîn, dîrokî û girîng ên ku ji hêla rêbertî û tevgera me ve hatine avêtin jî, hêzên serdest ên li Tirkiye û Sûriyeyê bi çavekî menfet û berjewendiyan nêzî vê pêvajoyê dibin. Em hemû dizanin ku dewleta Tirk polîtîkayên xwe yên der barê pirsgirêka Kurd de li ser Sûriyeyê jî ferz dike.
Li ser vê bingehê, tecrîda li ser Rêbertiya me bi awayên veşartî û bandortir berdewam dike. Wekî ku di hiqûqa navneteweyî de hatiye destnîşankirin, ‘mafê hêviyê’ tê paşguhkirin û ber bi çareseriyeke bingehîn ve nayê arastekirin. Rayedarên dewleta Tirk baş dizanin heya ku pirsgirêkên tecrîdê û mafê hêviyê neyên çareserkirin, di çareseriyên din de tu pêşveçûn çênabe. Tevahiya cîhanê û raya giştî şahidiyê dike ku Rêber Apo gavên stratejîk ji bo çareserkirina pirsgirêka Kurd, ku bingeha krîza Rojhilata Navîn e, diavêje û di astên bîrdozî, felsefî û pratîkî de bangên dîrokî pêşkêş dike. Lê belê, dewlet û hikûmeta Tirkiyeyê bi zihniyetek pragmatîk û berjwendîperest bi mijara çareseriyê re mijûl dibin. Ev jî dibe sedema ku pirsgirêk bê çareserî bimîne.
Ev rewş nayê qebûlkirin. Em gaziyên şer ên Rojava û Sûriyeyê ku heta niha fedakarî kirine, em ê bi heman hişmendî û têgihîştinê bidomînin. Helwesta me ya li hember Rêber Apo, helwestek li hember gelê Kurd û gelên herêmê ye. Ji bo me, Rêber Apo rêbaz, pîvan û xeta bingehîn e. Em baş dizanin ku Rêbertî ne tenê kesek e; ew bingeh û çarçoveya çareserkirina pirsgirêkên Rojhilata Navîn û Kurdistanê ye. Tevahiya jiyan, têkoşîn, pratîk û berhemên wî yên bîrdozî û felsefî delîla vê yekê ne.
Rêber Apo ne kesek ji rêzê ye, lê civak e, ne jiyanek ji rêzê ye, lê dîrok û îroyîn e. Em Gaziyên Şer ên Rojava û Sûriyeyê wê girêdana me ya bi Rêbertiya me ji her demê bêtir xurtir bibe. Em banga ji tevahî mirovahiyê, saziyên mirovî, pêşverû, demokratîk dikin ku maf û rastiya rêbertiyê biparêzin. Parastina Rêber Apo parastina mirovahiyê ye û nirxên Rêber Apo xeta me ya sor e.”
Daxuyanî bi berzkirina dirûşmên “Bijî Serok Apo” bi dawî bû.
