Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP) û Tevgera Jinên Azad (TJA) li navçeya Pirsûs a Rihayê di çarçoveya “Pêvajoya Aştî û Civaka Demokratîk” de meşek li dar xistin. Girseya ku li Rêxistina Navçeya Pirsûsê ya DEM Partiyê civiya, berî meşê belavok belav kirin û banga meşê kirin. Piştre meşvan ji Navenda Çanda Amara ber bi Meydana Bajarê Pirsûsê ve çû.
Piştî meşê, Hevseroka DEM Partî ya Rihayê Ayşe Surucu axivî û diyar kir ku ew di serdemeke girîng û dîrokî re derbas dibin û got, “Pêvajoyê bandor li Tirkiye û Kurdistanê kiriye. Em têkoşîna ‘Pêvajoya Aştî û Civaka Demokratîk’ jî berfireh dikin. Di komîsyona parlementoyê de nîqaş berdewam dikin. Lê destûr nehat dayîn ku Dayikên Aştiyê bi Kurdî biaxivin. Em vê yekê qebûl nakin. Em ê heta dawiyê ji bo aştî û çareseriyê şer bikin.”
Piştre, Serokwekîlê Koma DEM Partiyê Sezai Temelli bi bîranîna kesên ku di Komkujiya Pirsûsê de jiyana xwe ji dest dane dest bi axaftina xwe kir. Sezaî Temellî diyar kir ku heta ku aştî neyê Tirkiyeyê ti pirsgirêk çareser nabe.
Sezaî Temellî diyar kir ku çareserî ji aliyê Rêber Apo ve yê hilberandin û wiha got, “Ev çareserî yek û dîrokî ye. Bi hemwelatîbûna wekhev û bidawîbûna nefretê dikare were bidawîkirin.”
Temellî anî ser ziman ku divê komîsyona ku li Meclîsa hate avakirin gavên zû û bibiryar biavêje û destnîşan kir ku divê rêzê li mafên zimanê dayikê yên 25 mîlyon Kurdan bigirin. Temellî wiha got, “Komîsyonê divê bizanibe ku meseleya Kurd di heman demê de meseleya Kurdî ye û rêzê li gel û zimanê wê bigire.”
Temellî destnîşan kir ku têkoşîna aştiyê di heman demê de têkoşîna azadiyê ya jinan e û wiha got: “Ger em dixxwazin di nava civakekî wekhev de bijîn, em neçar in ku civakekî wekhev ava bikin. Em ê vê bi ser bixin.”
Meş bi çepik û dirûşman bi dawî bû.
