WAN
Li Wanê bi hezaran kes bi pêşengiya jin û ciwanan meşiyan û pankarta “Ciwan Rebêrê xwe dixwaze” hilgirtin. Hevseroka DEM Partiyê ya Wanê Gulşen Kurt diyar kir ku piştî banga 27’ê Sibatê Tevgera Azadiyê gav avêtine lê dewletê ti gavek neavetiye. Kurt bang kir ku divê xespa qeyûman bi dawî bibe, girtiyên siyasî bên berdan û statûya Rêber Apo bê naskirin.
ŞIRNEX
Li navçeya Cizîrê bi hezaran kes li Taxa Cûdî civiyan û bi stranên kurdî govend girtin. Girseya gel ber bi Meydana Çarçirayê ve meşiya. Parlamenter Mehmet Zeki Îrmez diyar kir ku têkoşîna wan ji bo komareke demokratîk e û got ku divê azadiya fîzîkî ya Rêber Apo bê dabînkirin. Çalakî bi girtina fenerên telefonan bi dawî bû.
ÇEWLIG
Gel li ber Mizgefta Haci Hidirê li hev civîna û heta Qada Bajêr meşiya. Di dema daxuyeniyê de hin kesên ku di bin parastina polîsan de bûn hewl dan provokasyonê bikin. Piştî bûyerê, li ser navê partiyê Omer Faruk Hulaku axivî û diyar kir ku ew ê bi gavekê re nemînin û ber bi aştiyê ve bibezen.
DÊRSIM
Rêxistina DEM Partiyê ji Kolana Hunerê heta Qada Seyîd Riza meşiya û pankartên kirmancî (zazakî) û tirkî hilgirtin. Hevserokê Bajêr Ozcan Ateş diyar kir ku piştî banga Rêber Apo ya 27’ê Sibata 2025’an, Tevgera Azadiyê agirbest ragihandiye û biryara feshê girtiye da ku çekan berde, lê hikûmetê ti gaveke berbiçav neavetiye.
RIHA
Bi pêşengiya Platforma Saziyên Demokratîk bi hezaran kes ji Novada Parkê heta Gola Masiyan meşiyan. Di meşê de postereke mezin a Rêber Apo hat vekirin û peyamên aştiyê hatin dayîn. Teksta daxuyaniyê ji aliyê Hevseroka DEM Partiyê ya Rihayê Ayşe Surucu ve hat xwendin.
MELETÎ
Welatî li Çerxerêya Kolana Akbayê hatin bal hev û bi dirûşmên mîna “Ji şer re na, a niha aştî” heta Çerxerêya Emeksîzê meşiyan. Daxuyaniya çapemeniyê ji aliyê Hevserokê Bajêr Musa Gurz ve hate xwendin.
DÎLOK
Li navçeya Şehîtkamîlê, ji herêma Cinderesiyê heta Nexweşxaneya Ankayê meşek hate lidarxistin. Di meşê de pankarta “Gavek ji bo Aştiyê” hat hilgirtin û girseyê gelek caran dirûşmên ji bo silavkirina Îmraliyê berzkirin.
ÎZMIR
Meş ji Qada Komarê dest pê kir û heta Meydana Gundogduyê berdewam kir. Metna daxuyaniyê ji aliyê Hevserok Fulya Erdogan ve hat xwendin. Paşê Parlamenter Îbrahim Akin axivî û bang kir ku li parlamenê komîsyonek bê avakirin, zagonên pêwîst bên çêkirin û dengê aştiyê li qadan hîn xurttir bibe.
COLEMÊRG
Ji avahiya DEM Partiyê ya navçeyê heta Navenda Kar a Zagrosê meş hate kirin. Di meşê de Parlamenter Onur Duşunmez, nûnerên ÎHD’ê û Dayikên Aştiyê cih girtin. Duşunmez diyar kir ku heke gel mil bide milê hev, aştiya mayinde dê hem ji bo vî bajarî hem jî ji bo hemû welat ava bibe.
MÛŞ
Bi pêşengiya Platforma Saziyên Demokratîk meşek ji xeta Yeşilceyê heta Taxa Yeşilyurtê hat lidarxistin. Gel bi klaman govend girtin û pankartên “Jin, jiyan, azadî” û “Ji bo birêz Ocalan statû” hilgirtin. Daxuyanî ji aliyê Hevseroka Bajêr Çîçek Tutuş ve hate dayîn.
ERZIROM
Platforma Saziyên Demokratîk li navçeya Qereyazî meşek li dar xist. Gel ji ber avahiya DEM Partiyê ya navçeyê heta Mizgefta Navendî meşiya û daxuyaniya çapemeniyê ji aliyê Hevserokê Erziromê Barış Kemaloglu ve hate xwendin.
BEDLÎS
Meş li navçeya Tetwanê ji ber Mala Mamosteyan heta qada fûarê ya li ber golê hate kirin. Parlamenter Huseyin Olan beşdarî meşê bû û bal kişand ser girîngiya Pêvajoya Aştî û Civaka Demokratîk; Olan diyar kir ku divê mercên guncav ên xebatê ji bo Rêber Apo bên amadekirin.
AGIRÎ
Gel ji Pirtûkxaneya Giştî ya kevin heta serê Kolana Komarê meşiya. Parlamenter Heval Bozdag bang li desthilatdariyê kir ku mafê Kurdan û kedkaran radestî wan bike. Beşa tirkî ya daxuyaniyê ji aliyê Serhat Yilmaz Koroglu ve, beşa kurdî jî ji aliyê Şîlan Turga ve hat xwendin.
ERDEXAN
Ji stadyuma bajêr heta avahiya PTT’ê ya navendî meşek hat lidarxistin. Gelek welatî û nûnerên saziyan beşdar bûn û di dirêjahiya meşê de dirûşmên mîna “Bijî aşitî” hatin berzkirin. Çalakî piştî daxuyaniyê bi dirûşman bi dawî bû.
ÎDIR
Çalakî li ber avahiya partiyê bi def û zirneyê û govendê dest pê kir. Paşê girseya ku Parlamenter Yilmaz Hun jî di nav de bû, bi dowîzên wekî “Demokrasî, wekhevî, dad” û “Jin, jiyan, azadî” heta Bulvara Zibeyde Hanim meşiya.
QERS
Welatî li Kolana Faik Bey hatin bal hev û ber bi Parka Parêzgeriyê ve dest bi meşê kirin. Parlamenterê Wanê Mahmud Dîndar û rêveberên partiyê beşdarî meşê bûn. Di çalakiyê de girseyê bêtir dirûşmên ji bo piştgiriya berxwedana zindanan berzkirin.
