Di çarçoveya 1’ê Sibatê Roja Piştevaniya bi Rojava re ya Cîhanê li bajarên Amûdê, Dirbêsiyê, Dêrik û Girkê Legê yên kantona Cizîrê meşên girseyî hatin lidarxistin.
AMÛDÊ
Bi hezaran kes ji şêniyên bajarê Amûdê bi bilindkirina wêneyên şehîdan û alên Kurdistanê ji Qada Jina Azad heya Qada Şehîd Cîhad meşiyan. Di meşê de bi yek dengî dirûşmên “Berxwedan jiyan e”, “Bijî Berxwedana Rojava” û “Gelê Kurd yek e” hatin berzkirin.
Meş li qada Şehîd Cîhad veguherî mîtîngê û deqeyek rêz hat girtin. Piştre ji rêveberên Rêveberiya Dibistanan Hena Xalid axivî. Hena Xalid di axaftina xwe de berxwedana gel û şervanan silav kir û got: “Her neteweyek xwedî welat, çand û nasname ye. Gelê Kurd bi çanda xwe ya aştiyê tê naskirin û hîna ji bo aştî û aramiyê têkoşînê dike. Lê hin aliyan rêya şer û wêraniyê hilbijartine.”
Hena Xalid diyar kir ku gelê Kurd di qonaxeke nû re derbas dibe û wiha pê de çû: “Ev qonax a parastina destkeftiyan e. 1’ê Sibatê bûye Roja Piştevaniya Rojava ya Cîhanê, bû sembola yekitiya dozê anku doza mîsogerkirina mafên rewa yên gelê Kurd di destûra Sûriyeyê de. Em ê herêmên xwe biparêzin. Em li qadan li ber xwe bidin ta mafên xwe bi dest bixin.”
Mîtîng bi berzkirina dirûşmên silavkirina berxwedana Rojava bi dawî bû.
DIRBÊSIYÊ
Li bajarê Dirbêsiyê jî bi hezaran kes meşek girseyî li dar xist. Girse bi berzkirina dirûşmên “Bijî berxwedana Rojava” ber bi çerxerêya Gardînyayê ve meşiya.
Li çerxerêya Gardînyayê piştî deqeya rêzgirtin, endamê Însiyatîfa Gel a bajarê Dirbêsiyê Silêman Xelîl axivî. Silêman berxwedana gelê Rojava ya parastinê hebûna xwe ji êrişên qirkirinê silav kir û got: “Kurdistaniyan banga seferberiya giştî ya parastina Rojava bersivand û bala tevaniya cîhanê kişand ser herêmê. Her wiha ji cîhanê re îsbat kir ku Kurd teslîm nabin, lê ji bo mafên xwe têkoşînê dike. Berxwedana Rojava rihê neteweyî yê gelê Kurd kir ye.”
Silêman Xelîl di dewama axaftina xwe de da zanîn ku seferberî û têkoşîna rewa hîna dewam dikin û ev li gotinên xwe zêde kirin “Em ê li ser şopa şehîdan û xeta neteweyî berxwedanê bidomînin, ta mafên xwe yên rewa mîsoger bikin. Berxwedan vebijêrka me ya yekane ye.”
Meş bi berzkirina silavkirina berxwedana Rojava û yekitiya gelê Kurd bi dawî bû.
GIRKÊ LEGÊ
Şêniyên bajarê Girke Legê, Rimêlan û gundewarên wê meşek li dar xist. Meş ji qada Şehîd Xebat bi rakirina alên Kurdistanê, YPJ,YPG û QSD`ê dest pê kir.
Piştî deqeyek rêzgirtinê li ser giyana şehîdan Hevserokê Meclisa Gelan a Bakur û Rojhilatê Sûriyeyê Kenan Berekat axivî û wiha got: “Gelê Kurd di pêvajoyeke dîrokî ya hesas re derbas dibe. Gelê Kurd bi hêz, yekitî û destekdayîna hêzên xwe yên leşkerî hemû hewldanên qirkirina gelê Kurd têk birin.”
Her wiha Kenan Berekat anî ziman ku divê her kes di vê pêvajoyê de baldar be, yekitiya xwe xurt bikin û bi hevre li hemberî êrişên li ser herêmê têne kirin, bisekinin.
Meş bi dirûşmeyên “Bijî berxwedana Rojava” û “Bijî yekitiya Kurdan” bi dawî bû.
Girkê Legê, Rimêlan ve bağlı köylerin sakinleri kitlesel bir yürüyüş düzenledi. Yürüyüş, Şehit Xebat Meydanı’ndan Kürdistan bayrakları ile YPJ, YPG ve QSD bayrakları taşınarak başladı.
DÊRIK
Li bajarê Dêrikê jî meş ji qada Azadî ya bajar dest pê kir, di meşê alên Kurdî û pankartên li ser hatibû nivîsandin` Bijî berxwedana Rojava” û”Bijî yekitiya Kurdan” vekirin.
Meş li pêşiya Navenda Ciwanan a Şehîd Bawer veguherî mîtîngê û deqeyek rêz hat girtin. Piştre endamê Tevgera Civaka Demokratîk (TEV-DEM) Ebduselam Ehmed axivî û wiha got: “Şoreşa Rojava û fedakariya şehîdan yekitiya gelê Kurdistanê çêkirin.”
Ehmed di berdewamiya gotinên xwe de got tevahî dewletan komplo li gelê Kurd kirin û wiha berdewam kir: “Îradeya gelê Kurd, hevgirtina wan û berxwedana wan hemû hevsengiyên navneteweyî guhertin. Gelê Kurd ji bo deskeftiyên Şoreşa Rojava biparêzin rabûn ser xwe û li qadan e. Divê em têkoşîna xwe berdewam bikin heyanî ku hemû komployên navneteweyî yên li dijî gelê Kurd têk bibin.”
Mîtîng bi dirûşmên “Bijî berxwedana Rojava” û “Bijî yekItiya gelê Kurd” bi dawî bû.
