Ji fermandarên HPG’ê Amed Malazgirt, Seyîdxan Dersim, Sîdar Heştanin, Berwar Urmiye û Şerîf Amed beşdarî pîrozbahiyê bûn.
Di merasîmê de hate destnîşankirin ku çalakiyên çekdarî yên destpêkê, çalakiyên Dih û Şemzînanê ku 15’ê Tebaxa 1984’an bi pêşengiya Mahsum Korkmaz (Fermandar Egîd) hatin lidarxistin, xaleke werçerxê ya têkoşîna azadiyê û hebûnê ya gelê Kurd e.
Ji fermandarên HPG’ê Amed Malazgirt axivî û got, piştî darbeya leşkerî ya 12’ê Îlonê kadroyên damezrîner ên PKK’ê yên ku şûna teslîmiyetê berxwedan hilbijartin, rêya azadiyê ji bo gelê Kurd vekirin.
Malazgirt ji şehîdên dawiyê Alî Haydar Kaytan (Fuat) û Alî Riza Altûn jî bi bîr anî û got, “Pêngava 15’ê Tebaxê bû wesîle ku gelê Kurd îro bi rengekî bi rûmet bijî.”
Malazgirt kadroyên pêşeng ên di têkoşînê de şehîd bûne bi bîr anî û bal kişand ser rolê Nureddîn Sofî yê ji bo xurtbûna berxwedana li Rojava ku 11’ê Tebaxê şehîd bû.
Malazgirt anî ziman ku ruhê 15’ê Tebaxê îro jî zindî ye û li ser bingehê deskeftiyên siyasî û leşkerî yên roja îro, ev ruh heye û got, “Li ser esasê ruhê 15’ê Tebaxê wê ji vir û şûnde jî têkoşîneke hîn mezintir were meşandin. Bi hezaran pêşengên mîna Egîd û Nureddîn Sofî wê xwedî li vê têkoşînê derbikevin. Eger îro têkoşîna me gihiştibe qonaxa encamgirtinê, rola pêngava 15’ê Tebaxê di vê yekê de mezin e.”
Fermandarê HPG’ê ev tişt jî got, “Ez bawer dikim ku em ê bi tecrubeya bi salan, encamên hîn serketîtir bigirin.”
Merasîm bi berzkirina dirûşmeyên “Bijî Serok Apo” û “Jin, Jiyan, Azadî”, sirûd û gerandina govendê bi dawî bû.
