Rêveberiya Tevgera Azadiyê ya Kurd bi daxuyaniyek çapemeniyê li Binarê Qendîlê pêngava dîrokî ya ku ji bo rê li ber pêvajoya Aştî û Civaka Demokratîk veke avêtiye, ragihand.
Di daxuyaniyê de Endamê Konseya Rêveber a KCK’ê Sabrî Ok, Endama Fermandariya Eyaleta Serhedê ya YJA Starê Vejîn Dersîm ku ji Bakurê Kurdistanê hate Herêmên Parastinê yên Medyayê û Endamê Konseya Fermandariya HPG’ê Devrîm Palu jî di nav de 25 gerîlayên azadiyê amade bûn.
Yek ji wan gerîlayên tevlî merasîmê bûyî gerîla Çeko Ayhan e ku ji herêma Serhedê ya Bakurê Kurdistanê vegeriyaye Herêmên Parastinê yên Medyayê. Çeko Ayhan di derbarê avêtina pêngava dîrokî ya gerîlayên azadiyê de ji ajansa Rojnews re axivî.
Çeko Ayhan diyar kir ku wan îro ev pêngava duyem a dîrokî di çarçoveya banga dîrokî ya ‘Aştî û Civaka Demokratîk’ de a ku Rêber Apo di 27’ê Sibata îsal de ragihand, pêk aniye û got, “Li ser vî bingehî wek gerîlayên Bakurê Kurdistanê bi taybetî li wan çeper û xetên ku ji bo pevçûnan hesasin, me dest bi vekişîna ji nava sinorên Tirkiye ber bi Herêmên Parastinê yên Medyayê ve kir. Ev pêngav ji bo pêşîlêgirtina pevçûn û hewldanên wan hêz û aliyên ku hewl didin pêvajoyê têk bibin û li ser xwîna Kurd û Tirkan dijîn, hat avêtin. Bi vê pêngavê em dixwazin pêşî li ber hewldanên xirabkirinê bigrin ku metirsiyê li ser pêvajoyê çêdikin.”
Di dewamê de gerîla Çeko Ayhan got: “ Divê ev pêngava me bibe sedem ku dewleta Tirk jî pêngavên ber bi çav û mezin ji bo pêvajoya aştiyê bavêje. Pêngava esasî jî azadiya Rêber Apo ye. Ger azadiya Rêber Apo pêk neyê, ti wateya pêngavan nîne, ji bo wê ev pêngavek gelek giring e.”
