Gerîlayên Azadiyê yên Kurdistanê Brûsk Rojhilat û Şîlan Argeş bi wesîleya Meha Şehîdan ji ANF’ê re axivîn.
Gerîla Brûsk Rojhilat di şexsê Hakî Karer de bi bîranîna şehîdên şoreşê dest bi aaftina xwe kir û got, “Meha Gulanê ji aliyê gelê Kurd û Tevgera Apoyî ve weke meha Şehîdan tê bîranîn. Rêber Apo di şexsê Hakî Karer de ji bo xwedîderketina li şehîdan gavên dîrokî avêt û PKK ava kir. Di vê mehê de gelek leheng şehîd bûn. Meha Gulanê li Rojhilat Şîrîn Elemhûlî, Alî Hayderyan, Ferzad Kemanger û Ferhad Wekîlî hatin darvekirin. Mehmet Karasûngûr û Îbrahîm Bîlgîn li Qendîlê şehîd bûn. Azad Sîser, Çekdar Amed, Hozan Mizgîn û herî dawî jî Sirri Sureyya Onder vê mehê şehîd bûn. Di salvegera şehadeta van hevrêyan de şehîdên Kurdistanê hemûyan bi hurmet bi bîr tînim.
Ji bo me ne tenê meha Gulanê her meh, her roj, her kêlî xwedî wateyeke cuda ye. Xwedîderketina li bîranîna şehîdan pîvana me ya bingehîn e. Eger îro pêvajoyek tê meşandin ev yek bi saya Rêber Apo û şehîdan e. Ewladên herî hêja yên vî gelî û van gelan li çiyê têkoşîneke gelekî mezin meşandin. Ev yek gelekî bi wate û hêja ye. Weke Gerîlayên Azadiyê yên Kurdistanê ku îro li çiyê têdikoşe, em ji her tiştî re amade ne. Em ê heta dawiyê bidin ser şopa Rêber Apo. Li ser vê bingehê wezîfeya me ye ku armancên şehîdan pêk bînin. Em ê ji niha û pê ve jî li ser vê bingehê hewl bidin.”
Gerîla Şîlan Argeş jî şehîdên şoreşê û Kurdistanê bi bîr anî û li ser girîngiya meha şehîdan got, “Ev meh ji bo me pîroz û hêja ye. Ne tenê meha Gulanê, hemû meh ji bo me girîng e. Ji ber ku di her kêliyê, her saetê û her mehê de şehîdên me çêbûn. Nêzîkatiya Rêber Apo ya li şehîdan ji bo me pîvan e. Rêber Apo di jiyan û pratîka xwe de xwedî li bîranîna şehîdan derdikeve. Bi şehadeta hevrê Hakî re Rêber Apo PKK ava kir. Li çiyayên Kurdistanê em biçin ku derê teqez li şopa hevrêyên şehîd rast tên. Çi dibe bila bibe em ê xwedî li bîranîna şehîdan derkevin.”
