Gerîlayên Yekîneyên Parastina Rojhilatê Kurdistanê (YRK) bi wesîleya 4’ê Nîsanê rojbûna Rêber Apo û 21’emîn salvegera damezrandina Partiya Jiyana Azad a Kurdistanê (PJAK) merasîmeke leşkerî lidar xistin.
Di merasîmê de fermandar Çiya Mahabad 76’emîn salvegera rojbûna Rêber Apo, li Rêber Apo, li Gerîlayên Azadiyê, gelê Kurd û mirovahiya pêşverû pîroz kir û ev tişt anî ziman: “Ev roj di heman demê de salvegera 21’an a damezrandina Partiya Jiyana Azad a Kurdistanê (PJAK) ye û em vê salvegerê jî bi taybet li gelê Rojhilatê Kurdistanê pîroz dikin. Rêwîtiya ku bi pêşengiya Rêber Apo dîrokek pir bi nirx û hêja afirandiye, bûye hêviya gelên cîhanê û bindestan. Rojbûna Rêber Apo hêviyeke mezin, hêja û binirx afirandiye û ev hêvî ber bi serketinê ve diçe.”
Fermandar Çiya Mahabad diyar kir ku asta îro gelê Kurd bi pêşengiya Rêber Apo gihiştiyê, ji tevahî cîhanê re bûye dersa aştî û azadiyê û anî ziman ku Rêber Apo destê aştî û xwişk-biratiyê dirêj dike.
Fermandar Çiya Mahabad ragihand ku divê her kes heqîqeta ku Rêber Apo jê re pêşengiyê dike bibîne û got, çareseriya pirsgirêkan, bi banga Rêber Apo ya ‘Aştî û Civaka Demokratîk’ pêkan e. Çiya Mahabad ragihand ku weke gerîlayên azadiyê yên Rojhilatê Kurdistanê û PJAK’ê ew piştgirî didin banga Rêber Apo û destnîşan kir ku projeya Rêber Apo dewleta Îranê jî di nav de her kesê digire nava xwe.
Çiya Mahabad bilêv kir ku di salvegera 21’an a damezrandina PJAK’ê de ew ê têkoşîneke hîn xurttir bimeşînin û bang li dewletên desthilatdar kir ku gavên pêwîst û şênber bavêjin.
Çiya Mahabad ev tişt jî got: “Rêber Apo coş û kelecana di Newrozê de çêbûyî, pîroz kir. Di 76’emîn salvegera meşa Rêber Apo de, gelê Kurd hebûna xwe îspat kiriye. Xeyala tunekirin û tasfiyekirina Kurdan, xeyalekî vala ye û ev yek ti carê jî encam nagire. Gelê Kurd îro weke stêrkeke geş a li asîman, ji tevahî mirovahiyê re bûye îlham. Êdî kes nikare vê rastî û heqîqetê veşêre. Ji dervey azadiya Rêber Apo, ti rêyên din tune ne. Bêyî azadiya Rêber Apo, ti aştî nabe. Em bawer dikin ku îsal wê bibe dawiya tecrîdê. Divê Rêber Apo derkeve û di nava gelê xwe de be. Divê bikare bi rehetî pêvajoya aştiyê birêve bibe. Bêyî Rêbertiya Azad û Welatekî Azad jiyan nabe. Em ê heya dawî bi vê rêwîtiya pîroz re bin.”
Piştî axaftinê dirûşmeyên “Bijî Serok Apo”, “Bi can bi xwîn em bi te re ne ey Serok”, “Bê Serok jiyan nabe” û “Jin Jiyan Azadî” hatin berzkirin.
Gerîlayan di dawiya merasîmê de bi wesîleya 4’ê Nîsanê dar çandin û piştre govend gerandin.
