Parlamentera DEM Partiyê Zeynep Odûncû êrişên li dijî taxên Kurdan ên li Helebê nirxand û anî ziman ku ev bûyer ne rasthatin e ne jî meseleyeek ewlekariyê ya xwecihî ye.
Zeynep Odûncû got, “Ev êriş di demeke welê de hatin kirin ku di navbera Hêzên Sûriyeya Demokratîk (QSD) û rêveberiya Sûriyeyê de nîqaş li ser çareserî, entegrasyon û diyaloga siyasî dihate kirin. Lewma hêzên ku naxwazin li Sûriyeyê şensê aştiyê xurt bibe, hêzên dijberê çareseriyê û alîgirên şer û kaosê bi zanebûn ev provokasyon kirin.
Herdu taxên ku bûne hedefa êrişan ji destpêka şerê navxweyî yê Sûriyeyê û vir ve 15 sal in di bin dorpêç, ambargo û xizaniya bi rêk û pêk de ne. Li van taxan bi hezaran mirov hene ku di heman demê de şêniyên Efrînê yên bi zorê hatin koçberkirin lê dimînin. Li van taxan hebûneke leşkerî nîne. Di çarçoveya peymana 1’ê Nîsanê de hêzên QSD’ê bi hemû çekên xwe yên giran xwe ji herêmê vekişand. Li gel vê yekê jî bi mehan e alîkariya mirovî, derman û pêwîstiyên bingehîn têne astengkirin. Îro jî yekser êriş li ser sivîlên van taxan tê kirin.
Lewma bûyerên li Helebê diqewimin bi rengekî eşkere sûcê li dijî mirovahiyê ye. Bi dehan sivîl birîndar bûn ku jin û zarok di nav de ne. Ev yek jî nîşan dide ku êriş yekser li gel tê kirin.”
Parlamenter Zeynep Odûncû anî ziman ku li Helebê êrişa li hemberî sivîlan bi taybetî jî li qadên Kurdan li nava raya giştî ya Kurd a li Tirkiyeyê bûye sedema fikaran û hêrsê û got, “Her êrişa li dijî sivîlan, jinan û zarokan li nava Kurdan wê hestê xurt dike ku hîn jî siyaseta înkar û îmhayê di dewrê de ye, ne îradeya çareseriyê.
Têkiliya Tirkiyeyê ya bi rêveberiya Şamê û hin komên çekdar ên li qadê ji aliyê raya giştî ve tê zanîn. Ji ber vê yekê bûyerên li Helebê diqewimin ji aliyê raya giştî ya Kurd a li Tirkiyeyê ne weke ‘bûyerên tenê li wir diqewimin’ tê dîtin, di heman demê de weke bersiva li pirsa tercîha siyasî ya Enqereyê tê nirxandin. Dewamkirina zimanê gefxwarinê, polîtîkayên şerker û rêbazên leşkerî dibe ku zerareke cidî bide bendewariyên li ser pêvajoya çareseriyê ku li Tirkiyeyê jinûve tê nirxandin.”
Zeynep Odûncû destnîşan kir ku bûyerên li derveyî sînor diqewimin divê bi gotinên diyalog û aştiyê yên li Tirkiyeyê bê nirxandin û destnîşan kir ku pêkanînên li qadê bandoreke yekser li bendewariyên raya giştî ya Kurd a ji pêvajoya çareseriyê dike.
Parlamenter Zeynep Odûncû got, “Divê ev yek bi eşkere bê gotin: gotinên têkildarî aştiya bi Kurdan re divê bi pratîka li qadê bê nirxandin. Li aliyekî li nava Tirkiyeyê nîqaşên li ser asayîbûn, diyalog û çareseriyê tê meşandin; li aliyê din li derveyî sînor Kurd têne dorpêçkirin, ji cih û warê xwe têne kirin û dibin hedef. Ev yek jî têkildarî samîmiyeta van nîqaşan dibe sedema pirsên cidî. Ev rewş hêviya ji bo aştiyê tîne ber şikestinê.
Eger Tirkiye dest ji siyaseta şer û gefxwarinê berde; Kurdan ne weke pirsgirêkeke ewlekariyê lê weke hêmana esasî ya aştiya herêmî bibîne û nêzîkatiyeke çêker û çareseriyê bipejirîne wê îhtimala aştiyê hem li Sûriyeyê hem jî li Tirkiyeyê xurt bike.”
