Di demek ku li Rojhilata Navîn guhertinên siyasî yên girîng çêdibin û pirsgirêka Kurd careke din di rojeva herêmî û navneteweyî de ye, Înîsiyatîfa Yekîtiya Demokratîk hate damezrandin. Hevberdevka Înîsiyatîfê û Parlamentera DEM Partiyê Gulcan Kaçmaz Sayyîgît, derbarê pêvajoya “Aştî û Civaka Demokratîk” de ji ANF’ê re nirxandin kir.
Gulcan Kaçmaz, li ser helwesta civakê ya li Kurdistanê, gotûbêjên çareseriyê yên li Meclîsê û nêzîkatiya yekîtiya neteweyî di vê pêvajoyê de axivî.
Gulcan Kaçmaz Sayyîgît, dibêje ku krîza kapîtalîst li seranserê cîhanê kûrtir dibe û li Rojhilata Navîn aloziyeke siyasî ya mezin rû dide. Gulcan Kaçmaz, destnîşan kir ku ev pêvajo ji bo gelên bê statû xetereyên cidî çêdike û got ku ji ber vê yekê Kurd di her alî de xwe ji nû ve birêxistin dikin. Gulcan Kaçmaz, da zanîn ku Kurd êdî qebûl nakin ku bên paşguhkirin û ji ber vê yekê bi rengekî xurt xwedî li pêvajoya aştî û civaka demokratîk derdikevin. Gulcan Kaçmaz, anî ziman ku bingeha çareseriyê di civakeke rêxistinkirî, yekîtiya neteweyî û muzakereyên demokratîk de ye û got ku Înîsiyatîfa Yekîtiya Demokratîk platformek sivîl e ku îradeya hevpar a gel rêxistin dike.
Gulcan Kaçmaz Sayyîgît, anî ziman ku dewletên herêmî bi salan e pirsgirêka Kurd paşguh kirine û bi taybetî polîtîkayên ewlehiyê yên Tirkiyeyê pirsgirêkê girantir kirine. Her wiha diyar kir ku gelê Kurd bêyî ku dev ji xeta xwe ya ji bo aştiyê berde, berxwedanek xurt nîşan daye. Gulcan Kaçmaz, destnîşan kir ku Rêber Apo bi salan e banga çareseriyek demokratîk dike, lê ji ber tecrîd û manîpulasyonê ev fikir negihiştiye gel. Gulcan Kaçmaz, da xuyakirin “Banga Aştî û Civaka Demokratîk” a Rêber Apo ku di 27’ê Sibatê de hatiye kirin, bandorek xurt di qada navneteweyî û herêmî de kiriye û got ku bi taybetî jî di nav Kurdan de tevgerek xurt a ber bi rêxistinbûn û yekîtiya neteweyî ve daye destpêkirin. Gulcan Kaçmaz, diyar dike ku îro civaka Kurd ne di pozîsyonek çavdêriyê de, berevajî di pozîsyonek pêşengiya pêvajoyê de ne.
Gulcan Kaçmaz Sayyîgît, da zanîn ku pirsgirêka Kurd pirsgirêkek piraliye ku zêdetirî sedsalekê dewam dike û got ku bi nêzîkatiyên seranser çareser nabe. Ew dibêje ku xeletiya herî mezin a dewletê ji demên berê heta niha ew e ku bi cidî nêzî vê pirsgirêkê nebûye. Gulcan Kaçmaz, diyar kir ku her çend di Meclîsê de lihevkirinek qismî hebe jî, nêzîkatiyek teng ku mafên neteweyî, siyasî û civakî yên Kurdan paşguh dike hîn jî serdest e. Ew destnîşan dike ku gelê Kurd piştgiriyê dide pêvajoyê, lê bêbawerî berdewam dike û got ku ji ber vê xebatên rêxistinbûnê û yekîtiya neteweyî bêhtir bûne. Gulcan Kaçmaz, destnîşan kir ku ji bo çareseriyê divê zîhniyeta ku pirsgirêkan afirandiye, bê derbaskirin.
Gulcan Kaçmaz Sayyîgît, diyar kir ku têkiliyên di navbera Kurdan de ji ber parçebûnên dîrokî, destwerdanên emperyal û polîtîkayên dewletê qels bûne û got ku tevî vê yekê, Kurdan qet dev ji fikra yekîtiya neteweyî bernedane. Gulcan Kaçmaz, destnîşan kir ku îro ji tecrûbeyên berê ders hatine derxistin û bingehek xurt ji bo yekîtiyê hatiye avakirin. Gulcan Kaçmaz, anî ziman ku armanca Înîsiyatîfa Yekîtiya Demokratîk bêyî ku mîrata dîrokî ya heyî paşguh bike, teqezkirina yekîtiya neteweyî ye. Gulcan Kaçmaz, di dawiyê de dibêje ku êdî yekîtiya neteweyî ji bo Kurdan ne mijareke ya taloqkirinê ye, bûye armancek stratejîk.
