Piştî banga ‘Aştî û Civaka Demokratîk’ a Rêber Apo li gelek qadan kar destpê kir. Li Bakurê Kurditanê liv û tevgera jinan a ji bo kombûna gel balê dikişîne. Jinên ku bi armanca ‘Ronesansa Jinê’ dest bi kar kirin û pêşengiyê ji pêvajoya aştiyê re dikin, li çar parçeyan têkoşîna xwe hevpar dikin. Ji bo yekîtiya neteweyî beriya çend rojan Konferansa Parlamenterên Jin ên Kurd hate lidarxistin. Parlamenterên jin ji gelek bajarên Kurdistanê tevlî konferansê bûn, pirsgirêkên jinan, banga aştiyê û rola jinan a di vê pêvajoyê de nîqaş kirin. Di konferansê de ku encamên girîng jê derketin, ji bo misogerkirina yekîtiyê li ser zemîna rêxistinî ya hevpar gihîştin hev.
Ji beşdarên konferansê aktîvîsta Tevgera Jinên Azad (TJA) û Parlamentera HDP’ê Gulser Yildirim bal kişand ser girîngiya yekîtiya jinên Kurd û têkoşîna hevpar. Gulser Yildirim got, “Ev gav dereng maye, lê gaveke gelekî hêja ye. Êşên li çar aliyên Kurdistanê divê bi berpirsyariyeke hevpar û sekneke hevpar bêne nirxandin.”
GAVEKE KU DIVIYABÛ BIHATA AVÊTIN
Gulser Yildirim di destpêka axaftina xwe de spasiya wan kesan kir ku ji bo lidarxistina konferansê ked dan û anî ziman ku ev hewldan bi serê xwe serketineke. Gulser Yildirim işaret bi daxuyaniyên Rêber Apo kir û anî ziman ku yekîtiya nava Kurdan pêwîstiyeke ku êdî nabe bê taloqkirin û got, “Ev fikir gaveke derengmayî ye lê belê diviyabû bihata kirin. Her yekê ji me zilma li ser gelê Kurd, zexta li jinan nirxandin û sekneke hevpar a li hemberî vê zilmê nîqaş kirin.”
LI HEMBERÎ PIRSGIRÊKÊN JINAN PÊWÎSTÎ BI NERAZÎBÛNEKE HEVPAR HEYE
Gulser Yildirim işaret bi darvekirina jinên Kurd a li Îranê kir û diyar kir ku ne tenê jin, her wiha gelê Kurd bi temamî tê hedefgirtin. Gulser Yildirim destnîşan kir ku jin di mijara yekîtî û berxwedanê de divê pêşeng bin û got, “Weke parlamenterên Kurd ên jin, em li ser wê yekê axivîn ku li hemberî vê yekê dikarin xwedî sekneke çawa bin. Ev yek ne tenê meseelya Îranê ye, meseleya tevahiya gelê Kurd e. Li ser mijarên hevpar, nerazîbûna hevpar û berpirsyariya ji hev, me li hev kir.”
EM Ê LI SER KEVNEŞOPIYA KURDISTANÎ BIXEBITIN
Gulser Yildirim ragihand ku di konferansê de ji Dersimê heta bi Enfalê, ji Rojava heta bi Leyla Qasim û Arîn Mîrkan hişê dîrokî bi rengekî hevpar hate bibîranîn û destnîşan kir ku ku van parvekirinan zemîna têkoşîna hevpar xurt kiriye. Gulser Yildirim got, yek ji pêşniyarên herî şênber ên ku beşdaran kirin ew bû ku ji nûnerên jin ên ji çar parçeyên Kurdistanê komîteyeke hevpar an jî yekîtî bê avakirin.
Di konferansê de işaret bi girîngiya pêvajoya aştiyê hate kirin ku Rêber Apo da destpêkirin. Gulser Yildirim qala piştgiriya parlamenterên jin ên ji Başûrê Kurdistanê ji bo pêvajoyê kir û ragihand ku divê bi diyalog û çareseriya demokratîk ew bi pêş ve biçin. Gulser Yildirim got, “Weke gava destpêkê divê weke tiştekî gelekî berhemdar û cihê hêviyê bê dîtin. Tişta ku em datînin pêşiya xwe ew e ku em li ser kevneşopiyeke Kurdistanî dixebitin. Yanî em dixwazin jiyanek, atmosferek û zemînek ji hemû ol, gel, nasname û rengan ava bikin. Divê ji bo vê yekê mirov bi hêvî bin. Ev gav divê biçûk neyê dîtin, berevajî vê yekê divê bê mezinkirin û civakîkirin. Eger bûyerên li Rojava diqewimin me eleqedar dikin, ji bo jinên li Rojhilat têne darvekirin jî divê em bi heman berpirsyariyê rabin.”
HÊVÎ TÊRÊ NAKE, PÊWÎSTÎ BI RÊXISTINIYÊ HEYE
Gulser Yildirim destnîşan kir ku ji bo kevneşopiyeke hevpar, jiyaneke hevpar û zemîna azadiyê ya Kurdan pêwîstî bi têkoşînê heye û got, “Em bi hêvî ne, lê belê hêvî têrê nake. Divê rêxistinî, kar û yekîtî bê mezinkirin. Jin pêşengê vê pêvajoyê ne.”
