Agirên Newrozê ku wê îsal bi şîara ‘’Newroza Azadî û Yekîtiya Demokratîk” li gelek navendan were pîrozkirin, li gelek cihan hate vêxistin. Li Amedê agirê yekem li ser bircan hate dadan û di heman demê de Newroza dawîn jî wê di 21’ê Adarê de were pîrozkirin. Ji bilî pîrozbahiyên li navendê welatiyên li gundan bi kelecaneke mezin li benda şeva 20’ê Adarê ne.
Gundiyên ku bi ruhê berê Newrozê pîroz dikin, her sal şeva 20’ê Adarê derdikevin serê çiyayên li gundê xwe, agirê xwe vêdixin û ji zarokan bigirin heya temenmezin li dora agirî govendê digerînin. Gundiyên ku tevî hemû zext, astengî û polîtîkayên koçberkirinê jî ne dev ji xakên xwe berdane û ne jî dev ji kevneşopiyên xwe berdane, îsal jî bi heman kelecan û hêviyê li benda dadana agirê Newrozê ne.
AGIRÊ NEWROZÊ JI BO WÊ QET NEHATE VENEMIRÎ!
Yek ji kesên ku ji ciwaniya xwe ve ye xwediyê vê kelecanê ye Rahîme Maçîn a 70 salî ye. Rahîme Maçîn a ku li cihê ku lê ji dayîk dibe Newrozê nas dike û tu caran dev ji li dora agirê Newrozê bernedaye, yek ji şahidên herî mezin ên pîrozbahiya Newrozê ye. Rahîme Maçîn a ku li dora agirê Newrozê dibe şahidê êşkence, windakirina bi darê zorê, şewitandina gundan û komkujiyan, tevî salên derbas bûne û pirsgirêkên tenduristiyê jî her sal heman rojê serkêşiya pîrozbahiya Newrozê dike. Rahîme Maçîn a ku bi gopalê xwe govendê digerîneû stranan distrê, got: ‘’Ez bi salan e vî agirî dişopînim, ez baş dizanim ku ev rê, rêya me ye.’’
GUND ŞEWITANDIN, SÊ KES WINDA KIRIN!
Rahîme Maçîn a ku li vî gundî ji dayik dibe, di sala 1994’an de ku pîrozbahiyên Newrozê wê salê gelekî dihatin astengkirin hem malbata xwe û hem jî gundê xwe winda dike. Di wê serdema ku gelekî gund dihatin şewitandin de birayên wê Tahsîn Çîçek û Alî Îhsan Çîçek di Gulana 1994’an de ji aliyê leşkeran ve tên binçavkirin. Piştî ku tên binçavkirin bi tu awayî agahî ji wan nayê standin û di heman serdemê de Çayan Çîçek jî yek ji wan e. Ev her sê kes piştî ku tên binçavkirin, tên windakirin. Leşkerên ku hewl didin bi van binçavkirinan gundiyan bitirsînin, her sal di heman serdemê e gundî gelek caran dişewitînin û wêran dikin. Leşker herî dawiyê zextê li gundiyan dikin ku koçber bibin. Tevî van yekan jî hinmalbat li gundî dimînin.
‘KEVNEŞOPÎ BI SALAN E BERDEWAM DIKE’
Rahîme Maçîn a ku wan rojan bi gotinên; ‘’Wan bi şevan xirab dikir me jî sibehan ava dikir’’ tîne ziman, got ku Newrozên ku di wan serdeman de dihatin pîrozkirin watedartir û biqîmettir bûn. Rahîme Maçînê diyar kir ku ew her sal bi heman kelecan û hêviyê diçin qada Newrozê û li wir govendê digerînin, ev yek anîn ziman: ‘’Ji Newroza ku min cara ewil pîroz kir û heya ya dawîn min tu kêlî ji bîr nekirine. Me li dora çiyayî agir vêdixist û govend digerand. Heya agir vedimirî em li wir diman û piştre jî vedigeriyan malên xwe.’’
‘HEWL DAN BI AGIRÊ NEWROZÊ GUNDÊN ME BIŞEWITÎNIN’
Rahîme Maçîn di dewama axaftina xwe de anî ziman ku piştî salên derbas bûne li gel bûyerên şewitandina gundan zexteke mezin li gundên wan kirine û hewl dane heya pîrozbahiyên Newrozê jî asteng bikin û got: ‘’Ew sibehan dihatin û dişewitandin, me jî bi şevan ji du daran dubare xaniyên xwe ava dikir û em li gundê xwe diman. Gundê me ne carekê gelek caran caran şewitandin. Wan çi qasî dixwest bibin asteng jî me darên xwe dida pişta xwe û em derdiketin ser çiyayan û me Newroza xwe pîroz dikir. Dixwestin ew agirê li çiyayan dihat dadan, vemirînin û gundên me bişewitînin. Lê belê bi ser neketin. Her sal ev agir tê dadan. Gelek sal derbas bûne lê belê ez hê jî li dora wî agirî govendê digerînim. Ez baş dizanim ku ew rê rêya me ye. Ez bi tena serê xwe jî bim ez Newrozê pîroz dikim. Di vê Newrozê de em agirê wê bi aşitiyê vêxin. Bi salan e em ji bo aşitiyê li ber xwe didin. Du birayên min hatin windakirin, gundê me gelek caran hate şewitandin û em îsal bi gotina aşitiyê biçin qadên pîrozbahiyê.’’
