Li Sûriyeyê jinên Elewî û Durzî bi xeteriya qirkirinê re rû bi rû ne. Li herêmên cuda yên Sûriyeyê zêdeyî 400 jin winda ne û aqûbeta wan nayê zanîn.
Tê diyarkirin ku di êrîşên 13’ê Tîrmehê yên Hikûmeta Demkî ya Sûriyeyê yên li ser Siwêdayê de, gelek jin hatin qetilkirin û 80 jin jî winda ne.
Êrîşên HTŞ’ê yên li hemberî jinên Elewî û Durzî, li bajarên Kurdistan û Tirkiyeyê tên protestokirin.
Endama Platforma Jinan a Dîcle Amedê Guneş Ozel ji ANF’ê re axivî û got, “Ev salên dirêje li Sûriyeyê şerekî navxweyî heye. Li Sûriyeyê DAÎŞ û rêxistinên cîhadîst li hemberî gelan polîtîkayeke qirkirinê dimeşînin.
Ji berê heya roja me ya îro, di şeran de bedena jinê weke amûreke şer tê bikaranîn. Berê me di qirkirina li hemberî gelê Êzidî de dît ku jin tên revandin, rû bi rûyê destdirêjiyê dimînin û li bazarên koleyan tên firotin. Niha jî heman hovîtî li hemberî jinên Durzî û Elewî tê kirin. Ev komkujî ji aliyê HTŞ û komên din ên cîhadîst ve tê kirin.
Mixabin ev polîtîkayên hovîtiyê di rojeva cîhanê de zêde cih nagire. Hemû cîhan tevî vê komkujiyê ji ber berjewendiyên polîtîk bêdeng dimîne.”
PIŞTEVANIYA JINAN DIVÊ XURT BIBE
Guneş Ozel diyar kir ku herî zêde jin ji şerên li Rojhilata Navîn bandor dibin û wiha got: “Dewletên Rojhilata Navîn li hemberî jinan, polîtîkayeke zextê ya cidî dimeşîne. Bi taybetî li Tirkiyeyê pratîka darazê, wêneyê vê herî zelal e. Li Tirkiyeyê hema bêje li hemû bajaran jin tên qetilkirin. Her roja hema bêje em 3 yan jî 4 tên qetilkirin. Jin li kolanan tên qetilkirin.
Ev komkujî çavkaniya xwe ji polîtîkayên desthilatdariya dijminê jinê û politîkaya bêcezahiştinê ya daraza mêr, digire. Ev polîtîka hêz didin mêran.
Êrîşên li Sûriyeyê li hemberî jinên Elewî û Durzî, zêde di raya giştî ya cîhanê de cih negirt. Divê piştevaniya jinan a navneteweyî, xurt bibe. Çawa li hemberî êrîşên li ser jinên Êzidî, hemû cîhanê deng da, divê em bibin dengê jinên Elewî û Durzî jî.
Li vir wezîfe dikeve ser milê hêzên navneteweyî yên mîna Neteweyên Yekbûyî. Li dijî van komkujiyan, polîtîkayên pêkanînê pêwîste. Divê ji hemû gelên li Sûriyeyê, mafê hemwelatiya wekhev were naskirin. Bi vî rengî wê pêşî li qirkirina jin were girtin.”
‘DIVÊ EM BIBIN YEK DENG’
Guneş Ozel bilêv kir ku weke ronahiya hêviyê ya Rojhilata Navîn, Şoreşa Jinê ya Rojava heye û got, “Li wir jinan jiyana azad ava kir û ji bo hemû jinên Rojhilata Navîn bûn hêvî. Jin di her qada jiyanê de cih digirin.
Li welatê me, Rojhilata Navîn û tevahî cîhanê divê em piştevaniya jinan xurt bikin û mezin bikin. Divê em xwedî li gelên xwe û jiyana xwe derbikevin.
Ez bang li hemû jinan dikim ku li dijî êrîşên li hemberî jinên Durzî û Elewî, dakevin qadan û bibin yek deng.”
