Berdevka Meclîsa Jinan a DEM Partiyê Halîde Turkoglû di civîna Meclîsa Jinan de axivî û bûyerên li Tirkiye û Rojhilata Navîn nirxand.
Halîde Turkoglû anî ziman ku ew ji bo plankirina serdema nû li hev kom bûne û ji Çîçek Otlû ya nexweş re şîfa, ji Dayika Aştiyê Zekiye Îlmen a jiyana xwe ji dest da re sersaxî xwest.
Halîde Turkoglû bal kişand ser rewşa girtiyên siyasî û got, di serî de Fîgen Yuksekdag berdana siyasetmedarên jin ji bo pêvajoya aştiyê pêwîstî ye.
Halîde Turkoglû di axaftina xwe de bal kişand ser bûyerên li Rojhilata Navîn û wiha axivî: “Şerê di navbera Dewletên Yekbûyî yên Emerîka-Îsraîl û Îranê de zêdetirî meheke berdewam dike û herî dawî peymana agirbestê hat ragihandin. Di vî şerî de jî herî zêde jin û zarok bandor dibin. Jinên Îranê li rex şer di heman demê de bi zext û tundiyên rejîma molla re jî rû bi rû ne. Aqubeta jinên ku li dijî rejîma Îranê xwe pêşandan li darxistinê jî nayê zanîn. Gelek jin jî ji ber tev li xwepêşendanan bûne hatinê girtin. Her wiha gelek jin jî bi cezayê dervekirinê re rû bi rû ne. Em bang li dewletên navneteweyî dikin ku ji bo rawestandina darvekirinan têkevin nava hewldanan û cezayê darvekirinê bidin rawestandin. Daxwazên xwepeşendaran rewa ne. Divê rejim van daxwazan bi cih bînê.”
Halîde Turkoglû pêvajoya Aştî û Civaka Demokratîk jî nirxand û got, “Ji qadên 8’ê Adarê heta bi qadên Newrozê îradeya jinê careke din israra li ser aştiyê nîşan da. Bi banga Birêz Ocalan re li nava gelan û jinan hêviya aştiyê mezin bû. Em ê nehêlin ku kes vê hêviyê têk bibe.”
Halîde Turkoglû destnîşan kir ku ji ber pergala zilamsalar jin bi kuştinê re rû bi rû ne û wiha pê de çû: “Polîtikayên zilaman diparêzin dibin sedema kuştina jinan. Divê desthilat ji bo parastina jinan qanûnan derxîne. Desthilat û sermayedar ji ber ku axa xwe diparêzin jinan dikin hedef.”
Di dawiya axaftina xwe de Halîde Turkoglû destnîşan kir ku wê aştî, wekhevî û azadiyê bi piştevaniya jinan ava bikin û di 1’ê Gulanê de li qadan bin.
