Komîteya Rêveber a Tevgera Şoreşger a Yekbûyî ya Gelan (HBDH), berxwedana mezin a karkeran a 15-16’ê Hezîrana 1970’an bi bîr anî û vê berxwedanê wekî derketina çîna karker li ser dikê dîrokê û berfirehkirina hişmendiya çînî pênase kir.
HBDH’ê, da zanîn ku di wê pêvajoyê de dema ku dewletê dixwest mafê sendîkayî ji karkeran bistîne, li Stenbol û Îzmîtê xwepêşandanên mezin destpêkirine û got, “Karkeran bi rawestandina hilberînê hêza xwe nîşan dan, ku ev yek desthilatdariyê tirsand û ji ber nekarî pêşî li vê berxwedanê bigire dewlet çare di ragihandina rewşa awarte de dît.”
HBDH’ê, destnîşan kir ku berxwedan ne tenê meseleya sendîkayî bû, têkoşîneke çînî bû ku bandorê li beşên mezin ên gel dikir. HBDH’ê, da xuyakirin ku her çend armanca berxwedana 15-16’ê Hezîranê li dijî desteserkirina mafên sendîkayî bû jî, ev çalakî daxwazên hevpar ên gelên bindest jî nîşan da û bû sedema şiyarbûnek civakî.
HBDH’ê got, “Ji bo tepeserkirina vê têkoşînê, sermaye û dewletê rêxistina çîna karker bi qanûna leşkerî, darbeyan, hêzên paramîlîter û êrîşên îdeolojîk hedef girtin, lê berxwedana gel tevî hemû zilmê berdewam kir. Berxwedana Geziyê wekî mînakek nû ya vê yekê derket holê.
Di serdema hikûmeta AKP’ê de zextên li ser karkeran berdewam zêde bûn. Grev hatin astengkirin, mafên sendîkayan hatin desteserkirin û kuştinên li cihên kar zêde bûn. Dewletê li hundir êrîşî karker û komên muxalif kir û di siyaseta derve de bi hêzên dagirker û emperyalîst re hevkariyê kir. Ev zext ne tenê bi AKP’ê ve sînordar in. Wekî ku di mînaka berxwedana karkeran a li Şaredariya Îzmîrê de tê dîtin, CHP’ê jî polîtîkayên dijî-karkeran pêk tîne. Zîhniyeta CHP’ê ya ku di demên berê de êrîşî karkerên ku ketine grevê kir, îro jî berdewam dike. Sedema ku AKP’ê nikare hin êrîşan bike ev e ku çîna karker niha rêxistinkirîtir û hişmendtir e.”
HBDH’ê di dawiyê de behsa têkoşîna şoreşgerî ya yekgirtî ya çîna karker a Tirkiye û Kurdistanê kir û got ku hêza karkeran a ji hilberînê tê dikare pergala kapîtalîst û polîtîkayên emperyalîst hilweşîne. HBDH’ê di vê çarçoveyê de, bang li karker, gelên bindest, jinan û hemû beşên pêşverû kir ku xwe birêxistin bikin û her kes ji bo siberojek bê çîn, bê îstîsmar û azad ji bo têkoşînek yekgirtî vexwend.
