Di destpêka daxuyaniya Komîteya Rêveber a Tevgera Şoreşê ya Yekbûyî ya Gelan (HBDH) de hate gotin, “Em îro ji komkujiyên giran ên rûpelên tarî yên dîroka mirovahiyê careke din bi bîr tînin. Helebce, Beyazit, Gazî û komkujiyên Lazkiye-Tartûs ku îro hîn jî diqewime. Ev nav nîşaneya êşê, zilm û berxwedanê ye. Her yek ji wan delîlekî ji sûcên li dijî mirovahiyê ne.”
Di daxuyaniyê de hate ragihandin ku komkujiya 16’ê Adara 1987’an a li Helebceyê, yek ji sûcên herî mezin ên rejîma Saddam Huseyîn û Baasê ya li dijî gelê Kurd e û hate gotin, “Bi çekên kîmyewî bi hezaran mirovên sivîl hatin qetilkirin. Zarok, jin, extiyar… Bêyî cudahî bê kirin mirovahî tine hate hesibandin. Rêveberiya Saddam ku xwest bi gelek çekan daxwazên azadî û wekheviyê yên gelê Kurd bitepisîne, bi vê komkujiyê re cihê xwe di nava rûpelên cihê şermê yê dîroka mirovahiyê de girt. Lê belê ne bombeyên kîmyewî yên Saddam ne jî tank û topên wî nekarîn têkoşîna wekhevî û azadiyê ya gelê Kurd lawaz bike.
Daxwaza tinekirina gelê Kurd ku dîktatoriya Saddam dixwest, niha heman daxwaza dewleta Tirk a faşîst e. Li ku derê destketiyekî gelê Kurd hebe êrîşî wê derê dike û dixwaze tine bike. Li gel biryara agirbestê ya PKK’ê li ser Herêmên Parastinê yên Medyayê û bajarên Başûrê Kurdistanê bi bombeyên kîmyewî û teknîka şer a herî pêşketî êrîş têne kirin, komkujî têne kirin.”
Di daxuyaniyê de hate destnîşankirin ku dewleta Tirk a faşîst û çeteyên wê kîjan çekê bi kar bînin bila bi kar bînin wê nikaribin bi komkujiyan gelê Kurd û têkoşîna azadî, wekhkevî û rizgariyê ya gelên bindest tine bike.
Di dewama daxuyaniyê de hate bibîrxistin ku 16’ê Adara 1978’an li Kampusa Beyazit a Zanîngeha Stenbolê di êrîşa bombeyî ya kontrgerîla û faşîstên sivîl de 7 xwendekar hatin qetilkirin, bi dehan birîndar bûn û hate gotin, “Ev komkujî parçeyek ji şerê faşızmê yê li dijî ciwanan, li dijî têkoşîna şoreşger a ciwanan bû. Di şexsê ciwanên hatin qetilkirin de xwestin enerjiya şoreşê ya tevgera ciwanan bitepisînin.
Lê belê Beyazit di heman demê de nîşaneya berxwedana li dijî faşîzmê ye. Eger em îro têkoşîna Beyazitê mezin dikin ev yek ji bo serxistina têkoşîna şoreşê ya yekbûyî ye.”
HBDH’ê diyar kir ku di 12’ê Adara 1995’an de li Taxa Gazî ya Stenbolê êrîşên li dijî Elewiyan rûyê qirêj ê dewletê û çeteyên faşîst careke din nîşan da û got, “Gazî nîşaneya hêrs û xweparastina gel e.”
Di daxuyaniyê de hate gotin, îro li Sûriyeyê li bajarên peravê Lazqiye û tartûsê li dijî Elewiyên Ereb komkujî tê kirin û hate destnîşan kirin ku Elewiyên Ereb îro bi paqijiya etnîkî re rû bi rû ne.
Di dawiya daxuyaniyê de hate gotin, “Doh Helebce, Beyazit, Gazî û îro Lazqiye-Tartûs… Ev komkujî deqeke reş a dîroka mirovahiyê ye. Lê belê em ji bîr nekin ku her komkujî destpêka berxwedanekê ye. Gelê Kurd, ciwanên şoreşger, Elewiyan… hemûyan li dijî zilmê têkoşîneke bi rûmet meşandin û hîn jî dimeşînin.
Îro bi bîranîna van komkujiyan re em ne tenê êşê bi bîr tînin. Her wiha em dersê ji rabirdûyê werdigirin û ji bo avakirina paşerojê têdikoşin. Li dijî faşîzm, pavşerûtî, emperyalîzm û her cûre zilmê em li ber xwe didin.
Em ê bi mezinkirina têkoşîna xwe ya şoreşê ya yekbûyî pêşî li komkujiyên nû bigirin; em ê di têkoşîna xwe de xwedî li bîranîna cangoriyan derkevin û hesabê her komkujiyê bipirsin.”
