Komîteya Rêveber a Tevgera Şoreşger a Yekbûyî ya Gelan (HBDH) daxuyaniyek weşand û got, “Di ser Komkujiya Madimak a Sêwasê re 32 sal derbas bûn. Agirê komkujiyê hîn jî li cografya Kurdistan û Tirkiyeyê dişewitîne.”
Di dewama daxuyaniyê de hate gotin, “Li Madimak a Sêwasê 33 mirov, şoreşger, rewşenbîr, hunermend bi saxî hatin şewitandin û qetilkirin. Di nava çend rojên ber bi 2’ê Tîrmehê ve her tişt amadekariyên ji bo komkujiyê bûn. Di nava çend rojan de dem û jiyana li Sêwasê ji aliyê dewleta Tirk a faşîst û Daîreya wê ya Şerê Taybet ve hate birêxistinkirin.”
HBDH’ê ragihand ku hêza paşverû, olperst û faşîst ku derdora 15-20 hezar kes bû bi saetan di nava ayîneke komkujiyê de bûn ku mirovahî bi saxî şewitandin û ev yek jî kirin weke xwepêşandan û şovekê.
Di daxuyaniyê de hate gotin, “Berpirsyarê Komkujiya Madimak a Sêwasê; partiyên siyasî yên sîstemê, sivîl-leşker, herêm-navendî û desthilatdariya koalîsyona DYP-SHP, bi kurtasî bi hemû saziyên xwe dewleta Tirk a faşîst bû. Ev çalakiya kontrgerîla bi destê çeteyên paşverû, olperest û faşîst hate kirin.
Komkujiya Madimakê ya Sêwasê xelekek ji polîtîkaya komkujiyan a dewletê ye. Di heman demê de dewamiya rêze pogrom û komkujiyên li hemberî Elewiyan ên li herêmên Mereş, Çorûm û Meletiyê ye.”
Daxuyaniya Komîteya Rêveber a HBDH’ê bi vî rengî dewam kir:
“Agirê Komkujiya Madimakê ya Sêwasê ew agir e ku di 19’ê Kanûnê de, her wiha li Pirsûs, Enqere, jêrzemînên Sûr-Cizîrê, li Sûriyeyê li Lazkiye û Tartûsê geşbûyî ye. Kiryarên ayîna komkujiyê jî hevkarê hev in. Kiryarê komkujiyên Elewiyên Ereb ên li Sûriyeyê dewleta Tirk a qirker faşîst û çeteyên wê yên olperest ên paramîlîter e ku bi rêxistin kiriye. Di navbera van komkujiyan de têkilî heye. Yên ku doh li Sêwasê kujer diparastin îro wezîr, paralmenter, serok û karmendên AKP’ê ne. Amadekar û kiryarên sereke yên Komkujiya Sêwasê Tansû Çîller, Meral Akşener, Mehmet Agar, Unal Erkan, Îbrahîm Şahîn, Alaaddîn Çakici, Korkût Eken, Dogû Perînçek û hwd. îro hîn bi biryardarî dibin yek û bûne parçeyek ji desthilatdariya faşîst a AKP-MHP’ê û dewama wan.
Dewleta Tirk weke doh îro jî Elewiyan û baeriya Elewiyan tine dihesibîne, maf û daxwazên herî xwezayî yên Elewiyan qebûl nake, polîtîkayên asîmîlasyonê dewam dike. Li gel Elewiyan li hemberî neteweya Kurd, netewe û hindekahiyên olî û etnîkî yên cuda heman polîtîkaya înkar, asîmîlasyon û qirkirinê tê meşandin. Ji ber vê yekê têkoşîna yekbûyî ya gelan weke pêwîstiyekê li pêşiya me ye.”
Di dawiya daxuyaniyê de hate gotin, “Komkujiya Madimakê ya Sêwasê roja rûbirûbûn û hesabpirsînê ye. Li hemberî vê sîstema ku hewl dide kujeran mafdar nîşan bide û ‘sûcê li dijî mirovahiyê’ bi dembihurînê ji hiş û dîrokê bibin, em ê komkujiyê nedin jibîrkirin û hesabê wê bipirsin.”
