Komîteya Rêveber a Tevgera Şoreşê ya Yekbûyî ya Gelan (HBDH) daxuyaniyek da û got, “Tevgera Şoreşê ya Yekbûyî ya Gelan di 12’ê Adara 2016’an de li Herêmên Parastinê yên Medyayê û di heman demê de li Stenbolê li taxa Gaziyê hate ragihandin.
HBDH ji damezrandina xwe û pê ve li Tirkiye û Kurdistanê li dijî faşîzma AKP-MHP’ê bû yek ji rêveberên têkoşîna Şoreşa Yekbûyî.
Li herêmên Parastinê yên Medyayê, li çiyayên Kurdistanê di parastina Şoreşa Rojava de, li gel têkoşîna azadiyê ya gelê Kurd gerîla û milîsên HBDH’ê bûn neferên xwedîderketina li vê têkoşînê.
Desthilatdariya AKP-MHP’ê ji sala 2015’an û pê ve li hemberî gelê Kurd, çîna karker a Tirkiyeyê, kedkar, jinan û nasnameyên bindest şerê topyekûn ragihand.
Desthilatdariya faşîst bi piştgiriya NATO, hikumeta Iraqê û PDK’ê hemû derfetên xwe bi kar anî û hewl da tevgera şoreşê ya yekbûyî tasfiye bike. Di nava 9 salên derbasbûyî de û di sala 10’emîn de desthilatdariya faşîst li gel ku hemû derfetên xwe bi kar anî jî karên HBDH’ê li her qadê dewam dikin.”
Di daxuyaniyê de weke Tevgera Şoreşê ya Yekbûyî ya Gelan soza serketina têkoşînê di sala 10’emîn de hate dubarekirin û hate gotin, “Di vê têkoşînê de bi sedan fermandar, şervan û milîtanên HBDH’ê tevlî karwanê nemiran bûn, bi dehan jê dîl hatin girtin.
Em careke din dixwazin bi bîr bixin ku rêya herî xurt a xwedîderketina li bîranîna wan serxistina têkoşîna şoreşê ya yekbûyî ye.
Herî dawî weke HBDH li hemberî komkujiyên çeteyên Selefî yên li Sûriyeyê yên li hemberî gelê Elewî, em bi xurtî li gel gelê Elewî yê Ereb in. Rejîma Erdogan a faşîst hevkarê komkujiyên li hemberî gelê Elewî yê Ereb e.
Em bang li karker, kedkar û bindestên ji hemû mezheban dikin ku li hemberî komkujiyan bikevin nava liv û tevgerê.
Weke HBDH em biryardariya xwe careke din nîşan didin ku em ê hesabê komkujiyên ku çeteyên faşîst kirine bipirsin.”
