Hevseroka Heyva Sor a Kurd Hediye Ebdullah ji ANF’ê re qala kar û xebata Heyva Sor a di pêvajoya seferberî û koçberiyê kir û wiha dest pê kir, “Kar û xebatên Heyva Sor a Kurd ê sereke di vê pêavjoyê de hatiye kirin xebatên tenduristî, ambulans, navendên Heyva Sor li seranserî Herêmên Bakur û Rojhilatê Sûriyeyê bi awayekî awarte kar û xebat kirin. Di rewşa koçberiyê de jî erka me ya sereke a Heyva Sor a Kurd em xwedî li gelê xwe derkevin. Ji bo rewşên awarte hertim qedereke pêwîstiyên ji bo rewş û demên lezgîn. Ji kêliya ku gelê me rastî koçberiyê hat, bi awayek lezgîn dest bi alîkariya gel kir lê hejmar û rewşa ku derketî pir mezin bû, lê dîsa jî me alîkariya gel kir. Ji ber ev rewşa koçberiya gel rewşa herî giran bû, gelê me gelek caran rastî koçberiyê hatine lê vê carê ji ber hemûyan berê xwe dan Qamişloyê ji bo wê jî zextek ser xebata me hebû. Piraniya gelê ku koçber bû berê xwe dan nav malan ji bo wê heta ku bîlançoya malbatan hate derxistin û alîkarî hate kirin, kêmek dem girt.”
Hediye diyar kir ku tîmên Heyva Sor a Kurd 24 seeta di nav kar û xebatê de bûn û wiha got, “Tîmên me 24 seatan di nav kar û xebatê de bûn, tîmên tenduristî, kilînikên gerok li cihê kombûnan hatin bicihkirin. Her wiha ji ber ku piranî gelê koçber bûye berê xwe dida Stadyuma 12’ê Adarê ji bo wê jî tîmek bi kilînkekê bi awayek berdewam li stadyuma 12’ê Adarê bi cih bibû. Her wiha di dema ku koçberî rûda, rewşa hawayê berf, baran û serma bû ji ber wê jî doxtorên di nav tîman de cihê xwe digirin bi awayek gerok kar dikirin. Ji bo zarokan pêdiviyên wan ên sereke weke şîr û gelek pêdiviyan bi awayeke berdewam dihatin belavkirin. Li kêleka wan ji bo malbatan singer û batanî dihatin belavkirin. Ji bo ku em bikaribin xwe bighînin herkesî tîmên me rojane berê xwe didan nav malan û bîlançoya wan malbatan kom kirin.”
Di nav axaftina xwe de Hediye qala alîkariyên ku dihate pêşkêşkirin kir û wiha got, “Heta roja çaremîn ji koçberiyê tenê Heyva Sor a Kurd di nav gel de bû, hîna ti rêxistinan berê xwe ne dabû gel, ji ber gelek rêxistin hene heta ku hejmarak taybet tune be alîkariyê pêşkêş nakin. Piştî wê hejmarek baş ji alîkariya ji bo Rojava hate şandin, Kurdên hemû cîhanê xwedî li Rojava derketin û bi taybet gelên Başûrê Kurdistanê gelek kampanya li dar xistin. Li aliyeke din Heyva Sor a Kurdistanê alîkariya xwe ji bo Heyva Sor a Kurd a Rojava bi awayek xurt pêşkêş kir. Ji despêka pêvajoyê û heta niha nêzî 300 hezar Dolar ji Heyva Sor a Kurd re pêşkêş kiriye. Dermanê ku diket destê me jî ji bo bi awayek tendurist û li gorî pêwîstiyê li ser gel were belavkirin me radestî desteya tenduristiyê kir. Li Qamişlo 6 nexweşxane û nêzî 30 navendên tenduristiyê dest bi belavkirina derman û pêwîstiyên tenduristiyê kirin. Di heman demê de li nexweşxaneya gel a Qamişloyê hemû beşên Eco û karên film kişandinê ne di xizmetê de bûn, weke Heyva Sor a Kurd me alîkarî da û pêdiviyên nexweşxaneyan pêkanîn da ku ew jî bikeve xizmeta gelê me yê koçber.”
Hediye Ebdullah diyar kir ku nêzî 12 hezar malbatên koçber li Qamişloyê bi cih bûne û wiha berdewam kir: “Nêzî 12 hezar malbatên koçber piraniya wan li Qamişloyê bi cih bûne, nêzî 4000 malbat di nav malan de bi cih bûne. Belavkirina alîkariyê li ser 116 dibistan û navendên ku hatine vekirin hate kirin. Li bajarên din jî gelê koçber belav bûye lê hejmara li wan bajaran ji hejmara gel ê li bajarê Qamişloyê kêmtir e. Li bajarê Dêrikê nêzî 20 dibistan hene ku tê de koçber bi cih bûne li bajarên din ji di navber 15-20 navendan ji bo koçberan hatine vekirin. Li Qamişloyê hemû pêdiviyên sereke weke cil, betanî, singer, gelek tiştên din ên ku rojan tên bikaranîn hatin belavkirin. Ev nêzî 5 roje me dest bi belavkirina alîkariyê di nav malan de kiriye. Taxa Xerbî, heta astekê taxa Hilêliyê, taxa Kornîş û taxa Enteriyê bi dawî bûne, heta çend rojan wê yên di nav malan de jî hemû alîkariyê ku ji wan re divê bigrin.”
Di dawiya axaftina xwe de Hevseroka Heyva Sor a Kurd Hediye Ebdullah anî ziman ku eger rewşa koçberên di dibistanan de wiha berdewam bike wê gelek metirsiyên tenduristiyê jî xwe re bîne û wiha bi dawî kir: ‘’Heta pêwîstiyên gelê me hebin em ê hebin. Rewşek giran ser me û gelê me re derbas dibe, lê dema ku em bi yek dest û yek dilî bi hev re alîkariya hev bikin, em ê vê rewşê derbas bikin û bikaribin bibin bersiv ji bo êşên xwe. Bûyerên ku hatin jiyîn pir bi êş bûn lê xwedîderketina Kurdan li gelê me yê Rojava destê Heyva Sor a Kurd jî xurt kir. Pêwîstiya gelê me yê koçber yê herî girîng di vê demê de vegera li ser axa xwe ye. Hem weke rêxistinek tenduristî û mirovahî em dibînin ku eger ev rewş ji vê zêdetir dirêj bike wê ber bi metirsiyên mezin ve biçe. Ji ber ev gel nabe hertim di dibistanan de bimînin, ji ber ev dibistan ji bo şagirtan hatiye avakirin û li gorî şert û mercên xwendinê hatine avakirin, cihê xwarin, şûştin û pêkanîna pêdiviyan tê de nîne. Hem jî bi cih bûna gel bi vê awayî divê cihê metirsiyê ku gelek nexweşî jî belav bibin, piraniya wan jî di demsala havînê de derdikevin. Ji ber vê divê çareseriyek were danîn.”
