Derbarê rojnamevan Gulcan Derelî, Kemal Taylan, Erdogan Alayumat, Berfîn Atli, Serap Guneş, Suzan Demîr, û Tugçe Yilmaz ku di çarçoveya lêpirsîna ji aliyê Serdozgeriya Komarê ya Eskîşehîrê ve di 26’ê Mijdara 2024’an de bi îdîaya “alîkariya rêxistina terorê” hatibû destpêkirin de hatibûn girtin, îdianame hate amadekirin.
Heqdestê ku rojnamevanan ji bo nûçeyên xwe yên ji bo rojnameya Yenî Ozgur Polîtîka û kovara PolîtîkArt wergirtine wekî sûc hatin hesibandin. Di îdîanameyê de ji bo rojnamevan heta 10 salan cezayê hepsê hat xwestin. Dadgeha Cezayê Giran a 13’yemîn a Stenbolê îdîaname qebûl kir û rûniştina yekem ji bo 9’ê Kanûna Pêşîn a 2025’an hat diyarkirin.
Di îdianameya li dijî 7 rojnamevanan hatiye amadekirin de, dozgeriyê heqdestên ku rojnamevan ji bo nûçeyên amadekirî û parvekirî hatine girtin, wekî sûc hesiband.
HEJMARA ŞOPÎNERAN JÎ DI ÎDÎANAMEYÊ DE CIH GIRT
Di îdianameyê de Yenî Ozgur Polîtîka û PolîtîkArt wekî “weşanên rêxistinî” hatin hesibandin. Nûçeyên rojnamevan Erdogan Alayumat ên li ser mîtînga DEM Partiyê û parvekirinê medyaya dîjîtal ên li ser çalakiyên DBP û TJA’yê wekî delîlên sûc hatine hesibandin.
Nûçeyên rojnamevan Gulcan Derelî yên li ser tayînkirina qeyûm û parvekirinên wê yên medyaya dîjîtal ên wekî delîl hatine zêdekirin. Hejmara şopînerên Derelî li ser platforma X û hesabên ku wê dişopand jî di îdianameyê de wekî delîlên sûc hatine nîşandan.
