Evîndar Ararat diyar kir ku êrîşên li ser Şoreşa Rojava di çarçoveya planeke qirêj a li dijî gelê Kurd hatiye pêşxistin. Evîndar Ararat anî ziman ku dewleta Tirk pêşengiya vê planê dike û hêzên koalîsyonê û hêzên hegemonîk jî hevkarên vê yekê ne. Ararat destnîşan kir ku gelê Kurd bi komployek mezin re rû bi rû ye û bi bîr xist ku hewl didin di vê sedsalê de jî Kurdan bê nasname û statu bihêlin.
Ararat anî ziman ku dijminên Kurdan yên ku sîstema Rojava wekî gef dibînin, dixwazin bi rêya Colanî û HTŞ’ê zîhniyeta DAIŞ’ê rewa bikin û li ser gel ferz bikin. Ararat diyar kir ku avakirina yekîtiay Kurdan wê bersiva herî mezin a li hember van hemû êrîşan.
Nirxandinên endama Koordînasyona PAJK’ê Evîndar Ararat wiha ne:
“Gelê me yê welatparêz, ciwanên me yên berxwedêr û dostên me yên hêja, ji 6’ê Çileyê ve êrîşek pir giran li ser Şoreşa Rojava tê kirin. Em dizanin ku di encama planeke hêzên navneteweyî de komployek nû ya navneteweyî li dijî gelê Kurd tê kirin. Ev plan di encama peymanên pir qirêj ên ku li ser Rojhilata Navîn hatine kirin de hatiye çêkirin. Armanc ew e ku destketiyên ku li Rojava bi berxwedaneke mezin a bi pêşengiya jinan û bi 13,000 şehîdan hatine bidestxistin, ji holê werin rakirin. Dixwazin gelê Kurd di vê sedsalê de jî bêstatu û bênasname bimînin. Gelê Kurd, jin û ciwanên Kurd îspat kirine ku ew ê tu carî jiyanek bênasname, bêstatu û koletiyê qebûl nekin. Wek Tevgera Jinên Azad, wek tevgera gelê Kurd me tu carî dijminatiya li hember gelên din qebûl nekiriye.
HEWL DIDIN DI ŞEXSÊ COLANÎ Û HTŞ’Ê DE DAÎŞ’Ê REWA BIKIN
Em ne dijminê kesî an welatekî ne. Armanca Rojava ev bû; jiyaneke aram, li ser bingeha yekîtiya gelan jiyaneke aştiyane, wekhev, azad û demokratîk e. Bi pêşengiya jinan ê yekê mayînde bikin. 14 sal in li Bakur û Rojhilatê Sûriyeyê piştî têkçûna DAÎŞ’ê li ser bingeha yekîtiya gelan tê birêvebirin. Jiyaneke demokratîk hate damezrandin. Lê mixabin ev pergala ku dijminê gelan û bi taybetî dijminên jinan, yekîtiya gelan û jinan û jiyana azad wekî gefekê ji bo xwe dîtin. Çawa ku wan 20 salan li Afganistanê Talîban wekî rêxistineke terorîst îlan kirin, bi wan re şer kirin û piştre wan anîn ser desthilatdariyê, niha jî dixwazin bi rêya Colanî û HTŞ’ê zihniyeta DAÎŞ’ê rewa bikin û bi gel bidin qebûlkirin. Şer li ser vê bingehê tê meşandin. Ne ji ber ku ew berjewendiyên gel esas digirin. Armanca wan a sereke ew e ku rizgariya jinan û şoreşa jinan hilweşînin û gelê Kurd mehkûmî koletiyê bikin.
Armanceke wan a din jî ew e ku li gorî berjewendiyên hêzên hegemonîk di navbera gelan de şer bimeşînin. Êrîşên ku li Şêxmeqsûd û Eşrefiyê dest pê kirin, niha li Kobanê, Hesekê, Qamişlo û Dêrikê, yanî li herêmên ku bi piranî Kurd lê dijîn berdewam dikin. Dewleta Tirk bi hêzên koalîsyonê û hêzên navneteweyî re wekî hevkar vî şerî rêve dibe. Li hemberî vê yekê, ciwanên Kurd, jinên Kurd û gelê me li seranserê Kurdistan û cîhanê bi têkoşînek mezin, berxwedan û çalakiyên bihêz xwedî li gelê Kurd û Şoreşa Rojava derdikevin. Di serî de ciwanên Kurd, jinên Kurd, dostên xwe yên enternasyonalîst û her kesê li kêleka gelê Kurd radiweste û xwedî li destketiyên Şoreşa Rojava silav dikin. Çalakiyên wan pîroz in û piştgiriya didin pîroz û dîrokî ye.
YEKÎTIYA NETEWEYÎ CARA YEKEM EWQASÎ RADIKAL DERKETIYE HOLÊ
Berxwedana YPG-YPJ, gelê Kurd, jin û ciwanên Kurd a li her kolanê Rojava li dijî êrîşan tê meşandin pîroz e û dîrokî ye. Em di şexsê Ziyad Heleb û Denîz Çiya de hemû şehîdên Rojava bi rêzdarî bi bîr tînin. Ruhê berxwedana Ziyad, Feraşîn û Denîzan êdî ruhekî neteweyî ava kiriye. Ev ruhê fedaî roj bi roj bi pêşengiya jin, ciwan û dostên wan li kolanên Kurdistanê û li seranserê cîhanê mezin dibe. Di vê pêvajoyê de cara yekem e ku xwedî li yekîtiya gelê Kurd, ruhê neteweyî, azadiya Kurdistanê û axa Kurdistanê derdiekev û yekîtiya neteweyî ewqas zindî, berfireh û radîkal tê jiyîn. Divê jin û ciwanên Kurd her roj pêşengiya vê têkoşînê xurt bikin û belav bikin.
Ji bo misogerkirina agirbestek mayînde hevdîtin tên kirin û ji bo parastina mafên gelê Kurd û destketiyên Şoreşa Rojava û şoreşa jinên Kurd diyalog tê meşandin. Lê hîn jî me van destkeftiyan misoger nekiriye.Ji ber ku planeke pir qirêj tê meşandin. Divê çalakiyên gel, jin û ciwanan qet lawaz nebin. Heta ku destketiyên Şoreşa Rojava, nasnameya gelê Kurd û şoreşa jinên Kurd werin misogerkirin û xwtwrî ji holê rabe divê ev çalakî berdewam bikin. Bê guman agirbestekjî bibe, li ser bingeha berjewendiyên gelê Kurd lihevkirineke çêbibe – ev yek wê bi têkoşînê pêk bikeve û bi xwedîderketina li YPG-YPJ’ê û gelê Rojava pêkan e- niha li Sûriyeyê zîhniyeta DAÎŞ’ê desthilatdar e. Dixwazin şovenîstekî bi navê Colanî wekî lîderê Sûriyeyê bidin naskirin.
Şerekî taybet ê pir qirêj tê meşandin. Di serî de ji hêla çapemeniya Tirk û çapemeniya dewletên Ereb ve şerekî taybet ê pir dijwar tê meşandin. Dixwazin destketiyên Şoreşa Rojava, hêvî û îradeya gelê Kurd, jinên Kurd û şervanên Kurd têk bibin. Gelê Rojava û tevahiya Kurdistanê niha li ser qada navneteweyî têkoşînek mezin dimeşîne. Divê em baweriya xwe bi vî şerê taybet neynin; divê em baweriya xwe bi hêza gelê me yê Kurd, jin û ciwanên xwe bînin. Eger em yekîtiya xwe xurt bikin, têkoşîna xwe xurt bikin, wê bi berfireh bikin, wê bidomînin û baweriya xwe bi hêza xwe bînin, wê demê em ê van planên qirêj têk bibin, azadiya gelê xwe misoger bikin û destketiyên şoreşê biparêzin.
Em bi taybetî bang li jin û ciwanên Kurd û gelê Kurd dikin ku van çalakiyan her roj li ser asta neteweyî mezin bikin û bidomînin. Ji ber ku ev xeter ne tenê li ser Rojava ye. Hemû gel û jinên Rojhilata Navîn eleqedar dike. Ger Rojava têk biçe, Rojhilata Navîn jî têk diçe. Ger zîhniyeta DAÎŞ’ê serdest bibe, Iraq jî wê belav bibe, Tirkiye jî wê belav bibe û cîhan jî wê belav bibe.
HÊZÊN KOALÎSYONÊ HEVKARÊN PLANA QIJRÊJ KU DEWLETA TIRK SERKÊŞIYA WÊ DIKE
Li Rojhilat û Îranê serhildanên gel çêbûn. Gelê Kurd, gelê Îranê û jin rabûne ser piyan; agahiyên ku komkujiyên mezin hatine kirine hene. Hêzên navneteweyî li hember vê rewşê bêdeng dimînin. Çawa ku dema gelê Filistînî li Xezeyê dihat qirkirin bêdeng man, çawa ku jinên Efganî li Efganistanê radestî hovîtiya Talîbanê kirin, niha jî dixwazin Şoreşa Rojava û jinên Rojava radestî zîhniyeta DAÎŞ’ê bikin. Îran jî di heman rewşê de tê hiştin. Divê em jî hişyar bin. Wek gelê Kurd, wek jin û ciwanên Kurd û wek dost û hêzên enternasyonalîst, divê em li dijî pergala kapîtalîst û rejîmên faşîst têkoşînek hevpar û gerdûnî bidin. Zîhniyeta DAÎŞ’ê niha ji nû ve zindî dibe. Mînakên vê yekê koçberkirina gelê me, qirkirina sivîlan, êşkencekirina cenazeyên şervan û sivîlan, avêtina şervanekî YPJê ji avahiyekê, teşhîrkirin û birîna porê şervaneke YPJ’ê.
Bi rastî ev zîhniyet xwe teşhîr dike; ev zîhniyet sûcên şer ên giran dike. Erka her ciwanekî Kurd, her welatparêzekî Kurd e ku van sûcên şer ji cîhanê re teşhîr bike û raya giştî seferber bike. Divê em banga seferberiyê tenê bi çalakiyan sînordar nekin; bêguman ev pir girîng e, bi mîlyonan, bi sed hezaran mirov beşdarî van çalakiyan bibin girîng e, lê têrê nake. Ji ber ku planeke pir qirêj heye. Hêzên navneteweyî hevkarên vê planê ne, ew pêk tînin û dewleta Tirk pêşengiya wê dike. Ji ber vê yekê, divê em polîtîkayên qirkirinê yên dewleta Tirk û sûcên şer ên ku ji hêla hêzên hegemonîk ve têne kirin hîn bêtir teşhîr bikin. Divê em çapemenî û medyaya dîjîtalî bikar bînin, dost û cîranên xwe seferber bikin, wan hişyar bikin, agahdar bikin û her kesî li dijî vî şerê qirkirinê yê li dijî gelê Kurd tê meşandin têxin nava tevgerê.
Divê em parlamenterên li hemû welatan, hemû demokratan, parêzvanên jiyana azad û wekhev, beşên femînîst, yên ku li dijî pergala kapîtalîst in, hemû hêzên bi ruhê Kobanê ya 2014’an seferber bikin. Ev ruh ji nû ve tê vejandin. Li welatên cuda, dostên me, yên ku li dijî pergala kapîtalîst in, bi pêşengiya gelê Kurd, jin û ciwanên Kurd, seferber bûne. Lê divê em vê xurt bikin. Ji ber ku xetere hîn jî berdewam dike û divê em vê yekê vebêjin. Hedef gelê Kurd e rast e, lê paşê hemû gel û jin bi xetereya zîhniyeta DAÎŞ’ê re wê rû bi rû bimînin. Ji ber vê yekê, çalakiyên jin, ciwan, gelê me û dostên me divê her tim berdewam bikin. Divê ev çalakî heta ku statu û azadiya gelê Kurd bi awayekî mayînde were misogerkirin berdewam bikin.
BERSIVA HERÎ MEZIN A KU EM DIKARIN BIDIN DIJMIN WÊ AVAKIRINA YEKÎTIYA KURDAN BE
Tolhildana me ya herî mezin li dijî dijmin dê afirandina yekîtiya gelê Kurd be. Li ser vê bingehê, em careke din şehîdên Şoreşa Rojava yên ku di têkoşîna li dijî DAÎŞ’ê de jiyana xwe ji dest dane bi bîr tînin. Bersiva me ji bo şehîdên me avakirina yekîtiya gelê me, parastina yekîtiya neteweyî û berdewamiya têkoşîna me li dijî van êrîşan e. Ciwanên me yên li ser banga seferberiyê çûn Rojava pîrêz dikim û silavên xwe ji wan re dişînim. Ez bawer dikim ku, li ser bingeha seferberiyê bi giştîtir, bi girseyîtir, kom bi komên ji çar aliyên cîhanê, bi taybetî ciwanên Kurd û dostên me yên enternasyonalîst, divê berê xwe bidin Rojava û li dijî zîhniyeta DAÎŞ’ê û polîtîkayên qirkirinê yên li dijî gelê Kurd bisekinin. Divê em vê plana qirêj a li dijî jin û gelan tê meşandin vala derxin. Serketin dê ya me, gelê me, jinên Kurd û ciwanên Kurd be.
Li ser vê bingehê, ez berxwedana gel, ciwan û jinên me yên ku bi ruhê seferberiyê beşdarî têkoşînê bûne silav dikim û ji wan re serketinê dixwazim. Şoreşa Rojava li ser felsefeya Jin Jiyan Azadî hatiye damezrandin, ew ê têk neçe, berxwedana jinên Kurd vê vê zîhniyeta DAÎŞ’ê yên ku dixwazin vê zîhniyetê vejîne têk bibe. Yekîtiya gelan, yekîtiya gelê Kurd û berxwedana jin û ciwanên Kurd wê bi ser bikeve û di dîrokê de were nivîsandin. Em ê dijminê xwe têk bibin. Li ser vê bingehê, em hemû berxwedêrên li eniya şer, hemû çalakvanên ku xwedî li Şoreşa Rojava û şehîdên derdikevin silav dikin û ji wan re serkeftinê dixwazin. Serketina Jin, Jiyan, Azadî wê bibe ya jinên Kurd, ciwanên Kurd û gelê Kurd.
