Hevpeyvîn beriya 28 salan bi hinceta xalên 8 û 30’emîn ên Qanûna Têkoşîna li dijî Terorê weşandina wê hatibû astengkirin. Niha li malpera Ozgur Duşunceler (Fikrên Azad) hate weşandin.
Di hevpeyvînê de Rêber Apo qezaya Sûsûrlûkê ya sala 1996’an weke xaleke şikestinê ya girîng a dîroka Tirkiyeyê nirxand û bal kişand ser çetebûyîna li nava dewletê û têkiliya wê ya bi narkotîkê re. Rêber Apo li ser hewldanên sûîqestê, şebekeyên li nava dewletê, trafîka narkotîkê û bandora hilweşîner a van avaniyan li ser herêmê rexneyên berfireh kir û ev yek şiband “Dewleta di nava dewletê de.”
Rêber Apo têkildarî valakirina gundan, kuştinên kiryar nediyar û encamên vê yekê yên li ser civakê yên salên 1990’î tespîtên girîng kir û qala ziyanên civakî û aborî yên gelê mexdûr kir. Rêber Apo rola dewletê û hin partî-aktorên siyasî yên di vê pêvajoyê de vegot û anî ziman ku çetebûyînê bi siyasetê re têkiliyên qirêj daniye.
Yek ji beşên herî balkêş ên hevpeyvînê jî banga Rêber Apo ya ji bo çareseriyê bû: “PKK asteng nîne. Serokwezîrê Îngilistanê dibêje, ‘Bila IRA çekan bêdeng bike, em ji her cûre diyalogê re amade ne’. Ez ji niha ve îlan dikim. Bila tenê diyalog bê danîn, em ê sibe çekan hemûyan bêdeng bikin.”
Rêber Apo li îradeya aştiyê ya dewletê pirsî, fikarên xwe yên li ser kapasîteya biryardanê ya muxatabên siyasî anî ziman û destnîşan kir ku li Tirkiyeyê hêzeke biryardanê nîne.
Rêber Apo got, “Bila min bikujin, lê belê bila xwedî hêza biryardanê be. Niha her kes berpirsyariyê dixe stuyê hev. Hêza biryarê nîne. Hinek dibêje pirsgirêka ewlekariyê, hinek dibêje hikumet, hinek dibêje parlament, niha jî çete derketine holê. Hêza biryarê nîne. ez dibêjim em ji Tirkiyeya xwe hez bikin. Em bi rastî jî Tirkiyeya xwe rizgar bikin. Em Kurdan jî rizgar bikin.”
Temamiya beşa yekemîn a hevpeyvînê ji vê lînkê dikare bê temaşekirin:
