Malbata gerîlaya YJA Starê Arvîn Çirav Botan (Şîrîn Işik) a ku di êrîşên dewleta Tirk ên li ser Xakurkê de 10’ê Nîsana 2018’an şehîd bû, li navçeya Akdenîz a Mersînê şîn danî. Rêveberên Komeleya Alîkarî û Hevgirtina bi Malbatên ku Xizmên Xwe li Dergûşa Şaristaniyê Winda Kirine (MEBYA-DER), rêveberên Partiya Wekhevî û Demokrasiyê ya Gelan (DEM Partî) yên bajar û navçeyan, parlamenterê Mersînê Alî Bozan, endamên Meclîsa Dayikên Aştiyê ya Mersînê, Komeleya Alîkarî û Hevgirtina bi Malbatên Girtî û Hikumxwaran re ya Çukurovayê (TUAY-DER) û endamên partiyê serdana şînê kirin.
HEWLDANA ASTENGKIRINA ŞÎNÊ
Polîsan nehiştin malbata li ber mala xwe şînê deyne û têketin û derketina taxê bi wesayîtên zirxî girtin. Piştî ku polîsan gefa ger kursiyek jî li ber malê were danîn ew ê êrîş bikin xwarin, xelk li ser peyarêya li ber malê rûniştin û sersaxî xwestin.
Hevserokê DEM Partiyê yê Mêrsînê Reşat Aşan diyar kir ku tevî astengiyê jî ew ê şînê deynin û got, “Em li erdê jî rûniştin, em ê sersaxiyê bixwazin. Bila serê malbatê û gelê Kurd sax be.”
‘EM ASTENGIYAN NAS NAKIN’
Rêveberê MEBYA-DER’ê yê Mersînê Bahattin Bektaş jî got, “Du roj in Walîtiya Mersînê û midûriyeta polîsan zext dikin û astengiyê derdixin. Em van astengiyan nas nakin. Em walîtî û midûriyeta polîsan bi tundî şermezar dikin.”
‘GELÊ KURD XWEDÎ LÊ DERKET’
Parlamenter Bozan jî bertek nîşanî astengkirina sersaxiyê da û diyar kir ku di hemû baweriyan de şîn tê danîn. Bozan got, “Em du roj in hewl didin ku xwe bigihînin rayedaran. Ew dibêjin şîn wê neyê danîn. Em dipirsin, çima? Ew dibêjin wan talîmat wergirtiye. Ew dibêjin ferman ji Enqereyê hatiye. Îro, em ji kesên ku nahêlin malbata me şînê deyne û hewl didin mafê şînê ji wan bistînin dipirsin: Ma li Enqereyê kesên ku li dijî aştiyê ne hene? Ma li Enqereyê kesên ku dixwazin ciwanên vî welatî bimirin hene? Yên ku mafê şîna malbata me asteng dikin ew kesên ku şerxwaz in. Çawa ku em heta niha alîgirê aştiyê ne, em ê ji niha û pê ve alîgirê aştiyê bin. Birêz Erdogan dibêje, ‘Tirk, Kurd û Ereb xwişk-bira ne’. Lê Kurd nikarin şînê bigirin. Tirk û Kurd xwişk-bira ne, lê Kurd nikarin bi zimanê xwe yê dayikê biaxivin. Ev zîhniyet 50 salên vî welatî winda kir. Werin, beriya ku dereng bikeve dev ji vê zîhniyetê berdin. Xwedî vê zîhniyetêdi sergoya dîrokê de cihê xwe girtin. Ger hûn di vê yekê cd israr bikin, hûn ê jî di sergoya dîrokê de cihê xwe bigirin. Gelê Kurd xwedî li ciwana xwe derket. Bi rûştina li nava kolanê şîna xwe danî. Em ê timî şînên xwe deynin.”
Serdana malbatê bi çepik û berzkirina dirûşma “Şehîd namirin” bi dawî bû.
