Heyeta DEM Partî û Partiya Herêman a Demokratîk (DBP) îro saet di 10:00 de bi Waliyê Silêmaniyeyê Heval Ebûbekir re li Walîtiya Silêmaniyeyê hevdîtin kir.
Heyet ji Hevserokê Giştî yê DBP’ê Keskîn Bayindir, Hevberdevkên Têkiliyên Derve yên DEM Partiyê Berdan Ozturk û Ebrû Gunay, Parlamentera Mêrdînê ya DEM Partiyê û Amîra Îdarî ya Meclîsa Tirkiyeyê Salîha Aydenîz û endama Tevgera Jinên Azad (TJA) Adalet Fîdan pêk tê.
Ji nûnerên DEM Partiyê yên li Silêmaniyeyê Muslum Kaplan û Feviye Şîran jî li gel heyetê tevlî serdanê bûn.
Heyet li walîtiyê ji aliyê Heval Ebûbekir û rêveberan ve hate pêşwazîkirin. Li gorî nûçeya Rojnewsê, di hevdîtinê de pêvajoya nû ya li Tirkiyeyê ku bi Banga Aştî û Civaka Demokratîk a Rêber Apo destpê kir, bûyerên li Rojhilata Navîn bi taybetî jî li Sûriyeyê û bûyerên li cîhanê hatin nirxandin.
Piştî hevdîtinê ku 45 deqeyan dewam kir, civîneke çapemeniyê ya hevpar hate ildarxistin.
Waliyê Silêmaniyê Dr. Heval Ebûbekir di daxuyaniyê de ragihand ku serketina li Bakur, serketina hemû Kurdên li her devera cîhanê ye, ji bo wê erkê hemû Kurdane piştevaniya pêvajoyê bikin. Heval Ebûbekir piştgiriya xwe ya ji bo şandeyê û pêvajoyê dubare kir û got: “Em hêvîdarin ku dewleta Tirk di demek nêz de bersivê bide vê pêvajoyê û êdî wext winda neke.”
Piştre Hevserokê DBP’ê Keskîn Bayindir di daxuyaniyê de axivî û wiha anî ziman: “Me bi hev re civîneke gelek baş pêk anî. Beriya niha dema ku Birêz Heval Ebûbekir serdana Bakurê Kurdistanê kir, me li ser pêşeroja Kurd û Kurdistanê gelek guftugokiribû. Bê guman ger ev pêvajo li Bakurê Kurdistanê pêş bikeve dê bandorê li parçeyên din ên Kurdistanê jî bike.”
Biryare şande li gel aliyên siyasî û kesayetên din ên Silêmaniyê jî kom bibe.
Hêjayî gotinê ye Şandeya DEM Partiyê ya Îmraliyê piştî ku di 28’ê Kanûna 2024 û 22’ê Çileya 2025’an de bi Rêberê Gelê Kurd Abdullah Ocalan re hevdîtin pêk anî, serdanên xwe domandin.
Divê çarçoveyê de Şandeya DEM Partiyê ya Îmraliyê ji bo bi rayedarên PDK û YNK’ê re hevdîtinan pêk bîne û peyamên Rêberê Gelê Kurd Abdullah Ocalan bigihîne, di 15’ê Sibatê (2025) de serdana Başûrê Kurdistanê kiribûn.
Şandeya Îmraliyê ya DEM Partiyê di nava 3 rojan de bi Serokê PDK’ê Mesûd Barzanî, Serokê Herêma Kurdistanê Nêçîrvan Barzanî, Serokê YNK’ê Bafil Talabanî, Cîgirê Serokê Hikûmeta Herêma Kurdistanê Qubad Talebanî û Serokê Hikûmeta Herêma Kurdistanê ya demborî Mesrûr Barzanî û Endamê Dîwana Serokatiyê ya YNK’ê Şanaz Îbrahîm Ehmed re hevdîtin pêk anîbû, û silav û peyamên Rêber Apo yên têkildarî pêvajoya nû ragihandibûn.
