Ji DEM Partiyê Celaledîn Erkmen anî ziman ku divê şerê li Rojava bi dawî bibe û got, “Mirovên li Rojava parçeyek ji me ye. Desthilatdariya AKP-MHP’ê ji bo tevkariya li aştiya li welêt divê berpirsyariya xwe bi cih bîne.”
‘Meşa Azadî û Çareseriya Demokratîk’ ku bi pêşengiya Platforma Saziyên Demokratîk di çarçoveya kampanya ‘Azadî ji Abdullah Ocalan re, çareseriya demokratîk ji pirsgirêka Kurd re’ ji Amedê ber bi Enqereyê destpê kir, doh li Edene û Mersînê bû. Meşa ku nûnerên gelek partiyên siyasî û rêxistinên civakî yên sivîl tevlî bûne, îro digihêje Enqereyê. Nûnerên partiyên siyasî û rêxistinên civakî yên sivîl ên tevlî meşê bûne ji ANF’ê re axivîn.
DIVÊ PÊVAJOYA AŞTIYÊ BÊ AVAKIRIN
Rêveberê Komeleya Çand, Yekîtî, Piştevanî û Alîkariya bi Malbatên Xizmên xwe Winda kirine yên li Dergûşa Şaristaniyan (MEBYA-DER) Mehmet Emîn Kiliç bal kişand ser girîngiya Meşa Azadiyê ji bo jinûve avakirina pêvajoya aştiyê û demokratîk û got, “Bi salan e êş tê kişandin. Agirê şer ê ku dema dawî li Rojhilata Navîn gur bû nêzî me bûye. Bi taybetî tecrîda mutleq a li ser Birêz Ocalan divê tavilê bê rakirin. Ji bo meseleya Kurd bi rengekî demokratîk bê çareseerkirin me ev meş lidar xist. Divê ev pirsgirêk tavilê çareser bibe. Divê desthilatdariyê gavên pêwîst ên ji bo çareseriyê biavêje.”
MUXATAB Û ÇARESERÎ DIYAR E
Hevserokê Amedê yê Partiya Herêman a Demokratîk (DBP) Mehmet Şîrîn Gurbuz anî ziman ku ew statuyeke ewle û aştiyeke bi rûmet dixwazin ku bersiv ji daxwaz û mafê gelê Kurd re tê dayin û got, “Bi Meşa Demokratîk û Azadiyê em dixwazin peyama xwe bi şênberî bigihînin desthilatdariya AKP’ê; muxatab diyar e, divê muxatab esas bigire û tecrîda li ser Birêz Ocalan tavilê rake, dest bi danûstandinan bike. Rêya çareseriya li Rojhilata Navîn ji çareseriya demokratîk a pirsgirêka Kurd derbas dibe.”
FERASETA YEKPARÊZ DIVÊ ÊDÎ BIQEDE
Rêveberê Rihayê yê DEM Partiyê Celaledîn Erkmen destnîşan kir ku ji bo pirsgirêk bi rêbazên demokratîk û aştiyane bê çareserkirin ew li qadan e û got, “Ji bo me gelekî girîng e ku gel bi rengekî azad xwe îfade bikin. Lewma bi salan e em dibêjin, divê ev feraseta yekparêz a ku bi sedan sal in dewam dike êdî biqede û hîn bêhtir xwîn neyê rijandin. Bi taybetî li Sûriyeyê, li Rojava divê şer biqede. Mirovên li Rojava parçeyek ji me ye. Desthilatdariya AKP-MHP’ê ji bo tevkariyê li aştiya li welêt bike divê berpirsyariya xwe bi cih bîne.”
DIVÊ HER KES DAXWAZA AŞTIYÊ BIKE
Hevserokê Dîlokê yê DEM Partiyê Mehmet Satan jî got, “Meşa Azadiyê meşek ji bo gel û baweriyên li Tirkiyeyê ye. Yek ji pirsgirêkên herî girîng ên welatê me pirsgirêka Kurd e û em dixwazin bê çareserkirin. Navnîşana çareseriyê ya vê pirsgirêkê jî Birêz Ocalan e. Lewma em ji aştîxwazan dixwazin ku vê qîrîna aştiyê bilind bikin.”
