Hizba Zehmetkêşên Kurdistanê, bi daxuyaniyekê piştgiriya xwe ji projeya neteweyî ya ku bi dirûşma “Yek e yek e yek e, gelê Kurd yek e” hatiye destpêkirin, ragihand. Ev proje bi îmzeya zêdetirî 200 kesayetên cuda yên ji Başûrê Kurdistanê bi armanca yekîtiya gelê Kurd hatibû destpêkirin.
Di daxuyaniya Hizba Zehmetkêşên Kurdistanê de ev xal hatin destnîşankirin:
Hizba Zehmetkêşên Kurdistanê, ji bo çalakkirina navendên biryardanê, piştgiriyê dide projeya yekîtiya neteweyî û dengê hevpar. Ji ber ku herêm di pêvajoyeke şer û guherînê re derbas dibe. Ev rewş, bi awayekî rasterast û nerasterast bandorê li rewşa Kurdistanê dike. Di warê çareserkirina pirsgirêkan, encamên şer, serdema piştî şer û geşedanên siyasî yên li herêmê de, avakirina siyaseteke hevpar a Kurdî îro erkeke neteweyî ye. Geşedanan nîşan da ku tevî taybetmendiyên têkoşînê yên li her herêmekê, kêşeya Kurd di cewherê xwe de yek e. Di vê çarçoveyê de:
- Em wekî berpirsiyariyeke neteweyî, piştgirî didin banga ‘Neteweyek Yekbûyî, Çarenûseke Hevpar; Projeya Lihevkirina Neteweyî dê navendên biryardanê yên cîhanê bixe tevgerê’. Em helwesta hestiyar û berpirsiyar a nivîskar, ronakbir, akademisyen û çalakvanên civaka sivîl bilind dinirxînin. Em hêvî dikin ku ev xebata berhemdar berdewam bike û bibe bingehekî xurt ji bo hevkariya neteweyî.
- Di heman demê de, wekî Hizba Zehmetkêşên Kurdistanê di vê serdema dîrokî û krîtîk de em bang li partiyên siyasî yên li Kurdistanê dikin; divê berjewendiyên bilind ên neteweyî di navenda xebatên siyasî yên hevpar de bin. Divê berjewendiyên giştî bikevin pêşiya berjewendiyên taybet û yên partiyan, û dawî li perçebûna siyasî were anîn.
