Her du tevgerên Şîe, ji bo protestokirina biryara hikûmetê ya di 5-7’ê Tebaxê de ya têkildarî xweçêkekirina milîsan bang kirin ku roja Çarşemê li navenda Beyrûdê xwepêşandan werin lidarxistin.
Xwepêşandan wê bi dirûşmeya ‘’Em tu caran biçûkxistinê qebûl nakin’’ li Qada Riad el-Sulh di saet 17.30’an de li pêşiya bînaya hikûmetê were lidarxistin.
Di daxuyaniyên her du tevgeran de jî hate diyarkirin ku biryara hikûmetê ya berbehs li dijî ‘’berjewendiyên neteweyî û Peymana Neteweyî’’ ye û hate destnîşankirin ku berxwedan li hemberî dagirkeriya Îsraîlê parastina welat û mafê azadkirinê ye.
Her wiha di daxuyaniyan de ev yek hatin gotin: ‘’Edî sebir nemaye. Ji bo redkirina teslîmiyet û serîtewandinê em banga çalakiyeke neteweyî dikin. Ev seferberî îfadeya parastina çekên me ye ku wan kariye hêza dijminên me têk bibin.’’
BIRYARA BÊÇEKKIRINÊ
Hikûmeta Libnanê, di 5’ê Tebaxê de ji artêşê xwestibû ku di serî de Hizbullah ji bo bêçekkirina hemû komên çekdarî plansaziyekê amade bike. Ev biryara hikûmetê bûbû sedem ku her du tevgerên Şîe bi dijwarî nerazîbûnên xwe nîşan bidin.
Hefteya borî Alîkarê Sekreterê Giştî yê Hizbullahê Naim Kasim hişyarî dabû hikûmetê û diyar kiribû ku ger bi darê zorê xwebêçekkirin were ferzkirin, ew amade ne ku li hemberî vê yekê bersivê bidin û li ber hev rabin.
PLANA DYE’YÊ
Biryara bêçekkirinê di heman demê de girêdayî ‘’nexşerêya’’ ji aliyê navbeykarê DYE’yê Tom Barrack ve hatî pêşkêşkirin û ji aliyê hikûmeta Libnanê ve hatiye erêkirin e.
Ev plana ku sepandina agirbasta di navbera Îsraîl û Hizbullahê ya Mijdara 2024’an de armanc dike, têkildarî bêçekkirina milîsan, hevdîtinên têkildarî jinûvediyarkirina sînorê bi Sûriyeyê re û hin pêngavên nûkirinê ye. Tê payîn ku Barrack vê hefteyê vegere Beyrûtê û bersivên Îsraîlê ragihîne.
BÊÇEKKIRINA KAMPÊN FILISTÎNÊ DEST PÊ KIR
Her wiha rêveberiya Libnanê, da zanîn ku di 22’yê Tebaxê de li kampên welêt ên penaberên Filistînî pêvajoya bêçekkirinê dest pê kiriye. Ev hewldana ku yekem pêngava plana ku sê mehan beriya niha hate îlankirin e, dabînkirina serweriya dewletê ya li ser çekan armanc dike. Di hevdîtina meha Gulanê de ya di navbera Serokkomarê Libanê Joseph Aoun û Serok Filistînê Mahmud Abbas de hatibû ragihandin ku wê çekên li kampan di bin otorîteya dewletê de werin komkirin. Lê belê hemû komên Filistînî yên li kampan dimînin, sepandina vê biryarê red dikin û li hemberî biryarê li ber xwe didin.
