Ofîsa Ragihandinê ya Partiya Yekitiya Demokratîk (PYD) têkildarî avakirina Parlamentoya Sûriyeyê (Meclisa Gel) daxuyaniyek da.
Di destpêka daxuyaniyê de îşaret bi girîngiya qonaxa veguhêz a ku Sûriyeyê tê re derbas dibe hat kirin û hate diyarkirin ku avakirina nû ya Sûriyeyê divê li ser bingehê îradeya tevahî Sûriyeyan be û li gorî bedelên ku şehîdan dane û hêviyên nifşên bê be.
Di daxuyaniyê de hate gotin, pêdiviya qonaxa heyî bi rêgeheke demokratîk heye ku li ser bingehên beşdariya rasteqîn û tevkariya nîştimanî, dûrî feraseta serdestî û hegemoniya biryarên yekalî yên li ser civaka Sûriyeyê têne ferzkirin be.
Di daxuyaniyê de hat diyarkirin ku israra li ser sepandina navendîtiya dewletê û jinûve hilbirandina siyasetên ku têkçûna xwe îsbat kirine, Sûriyeyek nû ava nake. Hate gotin “Ev kiryar ne li gorî pêdiviyên qonaxa veguhêz e. Di heman demê de baweriyê di nava Sûriyeyan de ava nake. Lê belê dûrxistinê xurt dike û derfetên gihiştina çareseriyeke nîştimanî ya giştî lawaz dikin.”
PYD‘ê fikarên xwe yên kûr ji ber tayînkirina endamên Meclisa Gel û temamkirina tayînkirina endamên mayî ragihand û wiha domand ” Tevî ku Kurd beşek resen ji dîroka Sûriyeyê û nasnameya wê ya neteweyî û pirrengiya wî ya siyasî û çandî ye, lê ev tayînkirin fikarin cidî li ser domandina rêgeha paşguhkirin û dûrxistinê, bi taybetî li dijî pêkhateya Kurd ên li deverên cuda yên Sûriyeyê bi taybetî li parêzgeha Hesekê çêdike. “
Di dewama daxuyaniyê de hate gotin : “Di demekê de ku Sûriyeyî dixwazin rûpela borî bitewînin û siberojeke demokratîk a hevpar ava bibe, nebûna nûnertiya rastîn û dadperwer a Kurdan di Meclisa Gel de bi rihê qonaxa veguhêz re nakok e. Di heman demê de îradeyek rastîn a ji bo avakirina Sûriyeyek li ser bingeha hemwelatîbûna wekhev, edalet û hevkariyê di navbera hemû pêkhateyên wê de ya dûrî polîtîkayên dûrxistin û dûrxistinê yên ku Sûriyeyî bi dehên salan êş jê kişandine, nîşan nade.”
Di daxuyaniyê de hate destnîşankirin ku mekanîzmaya hilbijartina endamên meclisê ne li ser temsîlkirina îradeya rastîn a civakê bû û hêviyên pêkhateyên wê yên cûda nîşan neda, ev yek pirsa li ser berfirehbûn û pêbaweriya vê pêvajoyê derdixe holê.
PYD‘ê da zanîn ku ji bo her pêvajoyek siyasî ya cidî pêdivî bi van xalan hene: “Hilbijartina kesên ku îradeya azad a civakên xwe nîşan didin, baweriya wan bi dest bixin, karibin pirsgirêkên wan çareser bikin, mafên wan biparêzin û bi awayekî çalak beşdarî şekildana pêşeroja welat bibin.”
PYD‘ê di dewama daxuyaniyê de îşaret pê kir ku beşdariya Kurdan di Meclisa Gel û tevahî saziyên dewletê divê aktîf û rasteqîn be û li gorî rêje û rola wan a dîrokî di Sûriyeyê de be, di heman demê de divê mafên wan ên neteweyî, siyasî û çandî di çarçoveya dewleteke demokratîk a nenavnedî ya li ser bingehê edalet, wekehvî, serdestiya qanûnê û rêzdariya li hemberî îradeya tevahiya pêkhateyan de mîsoger bike.
PYD‘ê di dawiya daxuyaniyê de bang kir ku “divê siyasta ku proseya avakirina Meclisa Gel pê hat rêvebirin, li ber çavan were girtin. Divê nêzîkatiyeke nîştimanî ya demokratîk esas were girtin ku nûnertiyeke adilane û giştî ya Kurdan û tevahî pêkhateyên gelê Sûriyeyê di saziyên dewletê de mîsoger bike. Bi pêkanîna van xalan dê aramî pêk were, Sûriyeyek demokratîk a nenavnedî ava bibe ku tevahî gelê wê bi awayekî wekhev beşdar bibin û rûmeta mirovên Sûriyeyê û mafên wan biparêze.”
