Daxuyaniya Navenda Ragihandin û Çapemeniyê ya HPG’ê (HPG-NRÇ) bi vî rengî ye:
“Hevrêyên me Arîn Ararat û Cîger Qîranî ku ewladên hêja yên gelê me yên Êzidî ne û tevlî Tevgera Azadiyê ya Kurdistanê bibûn, li Herêmên Parastinê yên Medyayê di dîrokên cuda de dema ku têkoşîna xwe dimeşandin, şehîd bûn. Em hevrêyên xwe Arîn û Cîger bi hurmetî û mînetdarî bibîr tînin û ji malbatên wan ên hêja, ji gelê berxwedêr ê Êzidiyan û tevahiya gelê Kurd ê welatparêz re sersaxiyê dixwazin.
Hevrêyên me yên ku bi îdîaya parastina destketiyên gelê me û têkoşîna azadiyê bi serketinê tacîdar kirin ketin rê, ji Şengalê heta Herêmên Parastinê yên Medyayê destaneke berxwedanê ya bêhempa nivîsandin. Ewladên leheng ên gelê me yê Êzidî ku xwe bi felsefeya Apoyî pêş xistine, bi berxwedana xwe ya li çiyayên Kurdistanê bûne qehreman. Hevrêyên me Arîn û Cîger bi sekn û tevlîbûna xwe mîrateyeke têkoşînê ya nayê jibîrkirin hiştin. Em careke din soza xwe dubare dikin ku em ê mîrateya hevrêyên xwe yên di rêya Apoyî de bi gavên jixwe bawer û bêyî didulî bi pêş ve meşiyan, veguherînin qonaxeke xurt a têkoşînê û bigihînin serketinê. Em di wê baweriyê de ne ku têkoşîna şehîdên me wê ji aliyê tevahiya ciwanên Kurd bi taybetî ciwanên Êzidî yên ji Şengalê ve mînak bê girtin.
Agahiyên li ser nasnameyên hevrêyên me yên şehîd bi vî rengî ne:
|
|
Nasnav: Arîn Ararat |
|
|
Nasnav: Cîger Qîranî |
ARÎN ARARAT
Hevrê Arîn li bajarê pîroz ê gelê me yê Êzidî, li Şengal ji dayik bû. Hevrêya me ya ku li bajarekî ku çanda kevnar a Kurd lê serdest mezin bû, bi hestek kûr a nasnameya Kurd mezin bû. Dilsoziya malbat û derdora wê ya ji bo nirxên civakê, hişt ku ew di temenek ciwan de bi nirxên xwe yên cewherî ve girêdayî mezin bibe. Hevrêya me, ku demekê çû dibistanên sîstemê, lêpirsînên kûr jiyan. Hevrêya me ku statûya jinê ya di nava civakê de qebûl nekir, di vê mijarê de her tim lêpirsîn kir û li hemberî têkoşîna gerîlayên YJA Starê hezkirinek wê ya mezin pêş ket. Hevrêya me ku sempatîzana xeta jina azad e û zîhniyeta serdest a mêr ku jinan wekî mal dibîne qebûl nekir, nerazîbûna xwe ya li hember pergala kapîtalîst xurt kir. Hevrêya me tevî derfetên kêm ji mûdaxeleya Tevgera Apoyî ya li hemberî êrîşên DAÎŞ’ê yên li ser gelê me ya li ser Şengalê gelek bandor bû. Hevrêya me ku cara ewil milîtanên fedaî yên Apoyî didît, ji her sekn û tevgera wan bandor bû. Hevrêya me ya ku hêzên YJA Starê ku bi ruhekî fedaî têdikoş in mînak girt û xeyala ku rojekê tevlî gerîla bibe kir, ji şehadetan bandor bû û ji bo tevlîbûnê lêhûr bû. Milîtanên Apoyî yên ku gelê Êzidî ji pençên qirkirinê rizgar kirine û berdêlên mezin ji bo siberoja azad dane, ji bo xwe mînak girt.
Hevrêya me ya ku sala 2015’an tevlî nava refên têkoşînê bû, piştî perwerdeyeke kurt cihê xwe di nava eniyên şer ên aktîf de girt. Hevrêya me ya ku pratîkeke giran derbas kir û zû tecrûbeyeke mezin bi dest xist, tevlî gelek pêngavên li dijî çeteyên DAÎŞ’ê bû. Bi her derba ku li çeteyên DAÎŞ’ê xist, tola jinên Êzidî yên li bazaran hatin firotin hilanî û wezîfeya xwe ya dîrokî bi cih anî. Berxwedana destanî ya Kobanê ku tevahiya cîhanê bandor kir, dilsoziya wê ya bi felsefeya Apoyî re kûrtir kir. Tevî şer jî, bi xwendina materyalên Partiyê her tim xwe pêş dixist. Hevrêya me ku her tim berê wê li warê gerîla bû, piştî ku erkên xwe yên şoreşgerî pêk anî, derbasî çiyayên azad bû. Hevrêya me ku zû adapteyî jiyana çiyê bû û di jiyana gerîlatiyê de tecrûbe bi dest xist, bi tevlîbûna xwe ya bi moral cihê xwe di dilê hevrêyên xwe de girt. Hevrêya me ku armanca wê di aliyê îdeolojîk de xwe kûr bike û di xeta jina azad de bibe milîtanekî baş, tevlî perwerdeya akademiyê bû. Hevrêya me di dema akademiyê de lêhûrbûnên kûr jiyan û xwest xwe di Bîrdoziya Rizgariya Jinê de kûrtir bike. Li ser vê esasê bi perwerdeyên ku wergirtî armanc kir ku bendewariyên pêvajoya nû pêk bîne. Hevrêya me ya ku perwerdeya xwe ya akademiyê bi serketî qedand û bû gerîlayeke jêhatî ya YJA Starê, li her qada lê bû li dijî zîhniyeta serdest a mêr şer kir. Hevrêya me Arîn ku di gelek mijaran de alîkariya hevrêyên xwe kir, bi nêzîkatiya xwe ya pratîkî sekneke mînakdar nîşan da.
Hevrê Arîn bi pêşniyara xwe beşdarî berxwedana destanî ya li dijî operasyonên ku artêşa Tirk a dagirker li dijî Herêmên Parastinê yên Medyayê dabû destpêkirin, bû. Hevrêya me bi hişmendiya ku layiqî şehîdên me yên ku li dijî gazên kîmyewî û bombeyên taktîk ên nukleerî yên dewleta Tirk a dagirker destan nivîsandin û bi têkoşîna xwe rêya me ronî kir tevgeriya, her xebata ku tê de cih girtiye bi hesasiyeteke mezin bi cih anî. Hevrê Arîn, ku bi gavên ji xwe bawer di xeta Apoyî de meşiya û yek ji hezaran fedaîyan e, di Kanûna 2021’an de di êrîşa dijmin de şehîd bû. Wekî hevrêyên wê, em soza xwe dubare dikin ku em ê bîranîna wê zindî bihêlin û xeyalên wê pêk bînin.
CÎGER QÎRANÎ
Hevrêyê me Cîger li Şengalê ji eşîra Qîranî ya civaka Êzidî li nava malbateke hêja ji dayik bû ku dilsozê kok û baweriya xwe ye. Zaroaktiya wî di bin siya êrîşên qirkirinê û asîmîlasyonê ya rejîma Baas a li hemberî gelê me yê Êzidî derbas bû. Hîn ji zarokatiya xwe ve li nava derdoreke welê mezin bû ku li hemberî êrîşên li dijî baweriyê li ber xwe dida. Gelê Êzidî ew gel e ku baş zane, windakirina baweriyê windakirina cewhera mirovbûnê ye. Hevrêyê me Cîger jî li ber vê ronahiya vê baweriya qedîm, her tim xwedî bawerî bû. Bi xurtî dilsozê rê û resmên xwe bû. Di salên ciwantiya xwe de, li hemberî polîtîkayên sîstemê yên li ser gelê me yê Êzidî ku mehkûmî xizanî û ambargoya aboriyê dikir, dest bi lêpirsînê kir. Ji bo karibe alîkariyê bi debara malbata xwe bike, ked da û di gelek karî de xebitî. Di heman demê de 8 salan xwend û ji bo li dibistanên rejîmê ji rastiya xwe dûr nekeve, dest ji dibistanê berda.
Hevrêyê me Cîger sala 2012’an Têkoşîna Azadiyê ya Kurdistanê nas kir. Ji bo karibe pêşî li fermanan bigire ku di sedsala dawî de ji ber bêparastinê gelek caran ferman li gelê Êzidî rabû, vê naskirinê hêviyeke mezin da wî. Hevrêyê me Cîger ku demekê ji aliyê PDK’ê ve hate girtin, gihîşt wê baweriyê ku divê tiştekî bike. Di sala 2014’an de di wê roja reş de ku êrîşa qirkirinê li ser gelê me yê Êzidî hate kirin, trajediyek ku nayê bîra mirovan bi serê gelek mirovan hat. Qetilkirina bi hezaran Êzidiyan, revandina bi hezaran jin ên ciwan bandoreke mezin li hevrêyê me kir. Dema ku gerîlayên HPG û YJA Starê li Şengalê bi hawara gelê me yê Êzidî hat, ji vê yekê hêzeke mezin wergirt. Dema ku dît hêzên hevkar wan di nava lepê mirinê de dihêlin, lê gerîla ji bo parastina gelê Êzidî canê xwe dikin çeper, hîn bêhtir bi bandor bû û li gel gerîla cih girt. Hevrêyê me Cîger du salan tevlî kar bû û sala 2016’an dît ku êdî ev têrê nake û biryar da, ku beşdarî nava refên partiyê bibe.
Hevrêyê me piştî perwerdeya xwe ya destpêkê tevlî nava karên partiyê bû û têkoşîneke welê meşand ku hem hêjayî gelê Êzidî bû hem jî gerîlayên azadiyê. Hevrêyê me fikirê ku ji Rêber Apo wergirtî bi baweriya xwe re kir yek û ji bo bibe şervanekî leheng ê gelê xwe gavên bi biryar avêt. Ji bo xwe bi pêş ve bibe gelekî hewl da. Hevrêyê me di nava wê kûrbûnê de bû ku paşdehiştin bû sedem ku trajediyeke bi vî rengî bê serê gelê wî û baweriya xwe bi wê yekê anî ku divê hem xwe hem jî civaka xwe bi pêş ve bibe. Hevrêyê me fêhm kir ku bêyî zaneb^nê xweparastin jî nabe û zanîbû ku gelê me yê Êzidî bi zanebûn ji vî alî ve bê pêşeng hatiye hiştin û ji bo xwe bigihîne asta pêşengiyê her tim hewl da.
Bi kesayetiya xwe ya dilnizm, bi hurmet, ku guhdarî dikir û hewl dida fêhm bike, li cihê ku lê dima, rengê xwe nîşan dida. Ji bo bide ser şopa bi dehan lehengên gelê me yê Êzidî û şoreşgerên leheng ên ku di têkoşîna dîrokî ya li dijî DAÎŞ’ê de şehîd bûn, ji bo hêjayî wan be sekneke bi biryar û daxwaz nîşan da. Zanîbû ku deynê xwe yê minetê tenê bi serxistina têkoşîna wan dikare pêk bîne û bi vê têgihiştinê tevgeriya. Ji bo gelê me yê Êzidî li ser piyên xw ebisekine, parastina xwe bike û bigihêje wê astê, hewl da berpirsyariyên xwe heta dawiyê bi cih bîne. Li ser bingeha hilanîna tola bi hezaran jinên Êzidî yên ji aliyê çeteyên DAÎŞ’ê yên faşîst ve hatin revandin û qetilkirin, hevrêyê me meşa xwe dewam kir û bi vî rengî rastiya dijmin a li pişt DAÎŞ’ê dît.
Ewladê leheng ê gelê me yê Êzidî weke şoreşgerekî heta dawiyê dilsozê baweriya xwe di nava têkoşînê de cih girt û her kêliya xwe bi berxwedaneke mezin derbas kir. Hevrêyê me Cîger di Nîsana 2019’an de li Herêmên Parastinê yên Medyayê di êrîşekê de tevlî karwanê nemiran bû. Hevrêyê me Cîger endamekî xurt ê baweriya Êzidiyan û gelê me yê Şengalê bû. Em ê hêjayî bîranîna wî bin û li ber bîranîna wî bi hurmet bejna xwe ditewînin.”
