Meclîsa Jinên Ciwan a Stenbolê ya DEM Partiyê xwest bi şîara “Em di jiyana sosyalîst de israr dikin, em bi Rêbertiya azad dimeşin” meş lidar bixe. Li ber Avahiya DEM Partiyê ya li Stenbolê meş hate astengkirin, jinan nerazîbûn nîşan da.
Di çalakiyê de bê navber dirûşmeyên “Jin Jiyan Azadî”, “Bijî Serok Apo” û “Bê Serok jiyan nabe” hatin berzkirin. Bi taybetî di dema berzkirina dirûşmeya “Bijî Serok Apo” de polîsan mudaxile dikir, jinan nerazîbûn nîşanî vê yekê da.
AŞTÎ XWIŞK-BIRATIYA GELAN MEZIN DIKE
Di dema dorpêça polîsan de jinan ji bo meşê israr kir, lê dîsa jî destûr nehat dayîn. Piştre ji Meclîsa Jinên Ciwan Ayşegul Sakalli daxuyaniyek kurt da û got, “Di 1’ê Îlonê de li ser aştiyê axaftin sûc e, şahiya aştiyê qedexe ye! Em natirsin, bêdeng nabin. Em ê aştiyê ava bikin, jiyanê jî em ê biguherin. Aştî xwişk-biratiya gelan mezin dike. Bila ji bîr nekin: Bi qedexekirina aştiyê, nikarin aştiyê tune bikin. Aştî daxwazek nîne, mafek e.”
Ji Hevserokatiya Stenbolê ya DEM Partiyê Arîfe Çinar jî bang li jinan û gel kir ku ji bo aştiyê têbikoşin û got, “31’ê Tebaxê di saet 14.00’an de em ê li mîtîngê bin. Ji bo aştiyê em ê bibin dengê civaka demokratîk.”
JI BO PÊVAJO BIGIHIJE AŞTIYÊ, DIVÊ GAV WERE AVÊTIN
Ji Meclîsa Jinên Ciwan a DEM Partiyê Avesta Ateş têkildarî qedexeyê û daxwazên jinan ji ANF’ê re nirxandin kir. Avesta Ateş diyar kir ku ew piştgiriyê didin pêvajoya ku ji aliyê Rêber Apo ve hatî destpêkirin û got, “Ji bo pêvajoya aştiyê bigihije aştiyê, divê gav bên avêtin. Em ji Rêberê xwe bawer dikin. Weke jin em pêvajoyeke welê dixwazin ku jin neyên kuştin, jin xwe îfade bikin, gel xwe îfade bikin, mirov bikarin biçin gundên xwe, bikarin zimanê xwe baxivin.”
