Hunermendê Elman bi strana xwe ya “Bijî Rojava” ya diyarî Şoreşa Rojava û enternasyonalîstên tevlî Peoples’ Caravan (Karwanê Gelan) bûne kir, bal kişand ser piştevaniya navneteweyî. Hunermend têkildarî pêvajoya derketina stranê û peyama ku dixwest bide, ji ANF’ê re axivî.
Berxwedana gelan, azadiya jin û rêveberiya xweseriya demokratîk a li Rojava hatî avakirin, bandora xwe li qada hunerê jî kir. Strana bi navê “Bijî Rojava” ya Hunermend TrueLu ya ku diyarî enternasyonalîstên tevlî Peoples’ Caravan (Karwanê Gelan) bûne kir, îşaret bi girêdana hestiyarî û polîtîk a bi Şoreşa Rojava hatî avakirin, dike.
‘HURMETA MEZIN A KU EZ NÎŞANÎ GELÊ ROJAVA DIDIM, BANDOR LI MIN KIR’
TureLu anî ziman ku dema stran çêkir hestê ku herî zêde bandor lê kir, hurmeta wî ya ji bo gelê Rojava bû. Hunermend destnîşan kir ku rêveberiya xweseriya demokratîk û têkoşîna azadiya jinê ya li Rojava, ji bo hemû cîhanê xwedî wateyeke jiyanî ye û got:
“Zihniyeta dewletên emperyalîst û DAÎŞ’ê li tevahî cîhanê ji bo azadiyê gefeke mezin e. Dilê min bi taybetî bi jinên ku li dijî vî dijminî şer dikin re ye.”
Hunermend dibêje, têkoşîna li Rojava bi berxwedanên li deverên cuda yên cîhanê re li ser xeteke hevpar dibe yek. TrueLu diyar kir ku ev hevkarî di wî de hestekî berpirsyariyê ya xurt çêkiriye û got, “Min hîs kir ku têkoşînên me bi hev dû ve girêdayî ne. Niha dem dema rabûnê û piştgirî dayîna şoreşê ye.”
‘DEM DEMA PIŞTGIRÎ DAYÎNA ŞOREŞÊ YE’
TrueLu diyar kir ku wî xwest bi “Bijî Rojava” peyameke zelal bide guhdaran û hêzên li Rojava têdikoşin. Hunermend bang li enternasyonalîstan jî kir û ev tişt got:
“Peyama min ji bo enternasyonalîstên li seranserî cîhanê ew e ku bi rengekî rêxistinkirî piştgirî bidin Şoreşa Rojava. Vê şoreşê nîşanî me da ku çi tişt pêkan in; niha tam dema piştgirî dayînê ye.”
Hunermend bal kişand ser piştevaniya li dijî dezenformasyona medyaya dewletê jî û ev tişt bilêv kir:
“Li Ewropayê û li cîhanê ji gotinên medyaya dewletê dûr, em dengê we dibîhîzin û hêza we hîs dikin. Em ê li Rojava û li her derê bi we re bin; em ê bi ser bikevin.”
DI TÊKOŞÎNÊ DE CIHÊ MUZÎKÊ
TrueLu rola piştevaniya enternasyonalîst jî girêdayî wateyeke dîrokî dike. Destnîşan dike ku muzîk tenê çiqekî hunerê nîne, di heman demê de bîra têkoşînan e:
“Li gorî min, muzîk di her têkoşînê de û di girêdana enternasyonalîstan de roleke girîng dilîze. Di têkoşînên şoreşgerî de kevneşopiyeke dirêj a muzîkê heye û muzîk dikare hêvî û vîzyonê bide me. Her wiha muzîk dîroka me diparêze.”
