Desthilata AKP û MHP’ê di demên dawî de zextên li ser çapemenî û muxalefetê zêde kiriye. Di nav du mehan de 16 rojnamevan hatin girtin. Di operasyona ESP’ê de 34 kesên din hatin girtin. Di 13’ê Çileyê de Şaredariya Akdenîz a Mêrsînê û di 29’ê Çileyê de Şaredariya Sêrtê hatin desteserkirin. Serokkomarê AKP’î Recep Tayyîp Erdogan gef li şaredariyên CHP’ê xwar. Nivîskar û endamê Meclîsa DEM Partiyê Ender Îmrek der barê geşedanên dawîn de ji ANF’ê re axivî û Ender Îmrek diyar kir ku desthilata AKP’ê ji hemû pêkanînên dijdemokratîk ên berê, rejîmên zordar û rewşa awarte sentezek çêkiriye û got: “Em dikarin bibêjin ku hîn jî travmaya desthilata AKP’ê heye. Ji tevgerên civakî yên wekî Gezî û berxwedana gelê Kurd a ji bo Kobanê ditirse. Hilbijartina xwecihî ya dawî xewnên Erdogan û AKP’ê revand. Muxalefet û hêzên şoreşger ew berteka gel a li Geziyê derket holê mezin nekirin. Ji ber vê yekê hîn jî gelek kes ji ber Geziyê tên girtin. Li aliyê din aboriya Tirkiyeyê di rewşeke pir xerab de ye. Deshilat ne xwedî wê dînamîkê ye ku pirsgirêkan çareser bike. Hemû bar daye ser pişta gel û ev bar her roj girantir dibe. Desthilat darazê weke amûra tundiyê bi kar tîne.”
Ender Îmrek anî ziman ku AKP li ser dijberiya pêkanînên rewşa awarte ji bo xwe bi kar anî û pê de çû: “Di rastiyê de AKP pêvajoya demokratîkbûnê û aştiyê binpê kir. Piştî wê karesatên mirovî li Cizîrê, Silopî, Sûrê hatin jiyîn. Em qala desthilateke wisa dikin. Dema ku em li tiştên di nava du mehên dawîn de qewimîne dinêrin, êrîşên li ser Çapemeniya Azad bi dijwarî didomin. Operasyonên ku li derveyê sînor bêyî navber didomin. Di hundir de zext û zordarî didomin. Desthilat hewl dide muxalefetê belav bike. Divê em bi vî awayî li pêvajoyê binêrin.
Em bi rîskeke wiha re rû bi rû ne; desthilat weke ku bi Kurdan re aştiyê dike xwe nîşan dide, divê em zanibin ku hesabê wê bê bandor kirine. Ez di wê baweriyê de me ku wê Tevgera Kurd vê yekê baş binirxîne. Li aliyê din CHP piştgiriya mezin a di hilbijartinên xwecihî de baş bi kar neanî. Li şûna ku bi awayekî topyekûn li seranserê welat belav bike û tevgerên girseyî yên gel çêbike, bi çend gotin, mîtîng û civînan hundirê wê vala kir. CHP’ê derfeta ku derket holê baş bi kar neanî.”
Îmrek destnîşan kir ku daxwazên gelê Kurd ên têkildarî azadî û mafan bi têgehên wekî “teror û terorîzm û dabeşkirina welêt” tên ravekirin û ev yek tê wateya bêçareseriyê û got: “Di rewşeke ku hevdîtinên li Îmraliyê didomin de divê dev ji gotinên ‘kujerê pitikan” û hwd. berdin. Zext û zordariya her didome. Zext û zordariya AKP’ê her ku diçe ji darbeya 12’ê Îlonê dijwartir dibin. Divê em li ser tevgereke xurt a li hemberî vê yekê biaxivin. Li hemberî vê yekê hewceyiya me bi tevgereke demokratîk heye.”
