Înîsiyatîfa Jinê ya “Pêwîstiya min bi aştiyê heye” bi dirûşma “Em di aştiyê de israr dikin” di serî de Stenbol û Amed li gelek bajaran daxuyaniyeke hevpar dan çapemeniyê. Jinan ji bo rêveçûna pêvajoya aştiyê bi rengê demokratîk û mayinde bang li hikumetê û Meclîsa Tirkiyeyê kirin.
Di daxuyaniyan de ku nûnerên rêxistinên jinan jî tevlî bûn, hate ragihandin ku di pêvajoya li Meclîsê de daxwazên jinan li ber çavan nehatin girtin.
Li Amedê daxuyanî bi Kurdî ji aliyê Seroka Komeleya Jinê ya Rosa Zeynep Şîpçîk ve hate xwendin.
Înîsiyatîfa Jinê, daxwazên sereke yên ku bi raporekê pêşkêşî Meclîsa Tirkiyeyê kiribûn bi bîr xistin.
BILA TMK BÊ RAKIRIN, GIRTIYÊN SIYASÎ BÊNE BERDAN
Di daxuyaniyê de hate ragihandin ku divê dawî li krîmînalîzekirina siyasetê bê anîn, bi taybetî Qanûna Têkoşîna li dijî Terorê (TMK) û hemû astengiyên li pêşiya azadiya fikir û rêxistinbûnê ji holê bêne rakirin. Jinan ji bo berdana girtiyên siyasî bang kirin.
Înîsiyatîfê daxwaz kir ku dawî li pêkanîna qeyûman a li ser şaredariyên DEM Partiyê bê anîn û biryarnameyên Serokkomariyê yên di dema Rewşa Awarte de hatin ragihandin bêne betalkirin.
Jinan operasyonên li dijî şaredariyên CHP’î jî rexne kirin û xwestin, hilbijartî li wezîfeya xwe bêne vegerandin.
PERWERDEYA BI ZIMANÊ DAYIKÊ Û XIZMETA CEMAWERIYÊ
Jinan bi taybetî diyar kirin ku li bajarên Kurdan benda li pêşiya ziman di xizmetên tenduristî û perwerdeyê de dibe sedema pirsgirêkên cidî. Lewma jî hate xwestin ku mafê perwerdeya bi zimanê dayikê bê naskirin û xizmetên cemaweriyê jî bi gelek zimanan bê dayin.
BI ABDULLAH OCALAN RE MUZAKEREYA BI MERCÊN WEKHEV
Di daxuyaniyê de hate ragihandin ku ji bo pêvajoya aştiyê bimeşe divê civak û rêxistinên jinan yekser tevlî pêvajoyê bibin û hate xwestin ku hevdîtinên bi Rêber Apo re bêne kirin di nava mercên wekhev de dewam bikin.
Di daxuyaniyê de hate gotin, “Divê guhertinên qanûnî yên pêwîst bêne kirin ku Abdullah Ocalan weke muzakerevanê wekhev ê sereke bê naskirin.”
Înîsiyatîfê ji bo lêkolînkirina sûcên şer xwest “Komîsyona Heqîqet û Rûbirûbûnê” bê avakirin.
