Înîsiyatîfa Rojnamevanên Kurd bi daxuyaniyeke nivîskî da zanîn ku dewleta Tirk di nava 6 mehên dawîn de 5 rojnamevanên Kurd qetil kirine û yek ji wan jî Azîz Koyluoglû ye û got: ‘’Divê rêbazên şer ên dewleta Tirk ên qirêj ji aliyê rêxistinên navneteweyî yên serbixwe ve werin lêkolînkirin û divê ev sûcên li dijî welatiyên sivîl tên kirin, bê ceza nemînin.’’
Naveroka daxuyaniya Înîsiyatîfa Rojnamevanên Kurd bi vî rengî ye:
‘’Hevrêyê me Azîz Koyluoglû yê ku şervanê heqîqetê û nûnerê serkeftî yê çanda Çapemeniya Azad, 27’ê Çileyê di encama êrîşa dewleta Tirk de hate qetilkirin. Di nava 6 mehên dawîn de bi destê dewleta Tirk 5 rijnamevanên Kurd hatin qetilkirin ku Azîz Koyluoglû jî yek ji wan e. Êrîşên ku lêgerînvanên heqîqetê hedef digirin, bi qestî ne. Dewleta Tirk hewl dide ku rê li ber ragihandina rastiyan bigire. Dewleta Tirk, rojnamevanên ku polîtîkayên dagirkerî û qirkirinê radigihînin ya qetil dike tan jî digire. Bi vê yekê hewl dide ku sûcên xwe yên li dijî mirovahiyê veşêre. Bila her kes baş bizanine ku xîmê çanda Çapemeniya Azad gelekî saxlem e. Ev xîm bi berdêlan hatiye ava kirin. Hêza xwe ji Apê Mûsa, Gûrbetellî Ersoz, Nûjiyan Erhan, Firat Denîz û Halîl Dag distîne. Ev çanda ku bi têkoşîn û fedakariyên mezin hatiye honandin, wê li hemberî tu zext û qirkirinê serê xwe netewîne.
Qetilkirina rojnamevanên Çapemeniya Azad sûcekî li dijî mirovahiyê ye. Divê rêbazên şer ên dewleta Tirk ên qirêj ji aliyê rêxistinên navneteweyî yên serbixwe ve werin lêkolînkirin û divê ev sûcên li dijî welatiyên sivîl tên kirin, bê ceza nemînin. Divê heqîqet were eşkerekirin her kes xwedî lê derkeve.
Her çi jî dibe bila bibe kedkarên Çapemeniya Azad bi biryar in ku rastiyan bi gelê Kurd re parve bikin û nûnertiya vî mafê ragihandina rastiyan bikin.
Bi deh salan e ku kedkarên Çapemeniya Azad bi van êrîşan tên hedefgirtin. Lê belê dewleta Tirk nekariye bi van êrîşan rûyê xwe yê qirkirinê veşêre. Qirkirinên dewleta Tirk ên ku rojnamevan, sivîl û zarokan hedef digirin wê bê encam bimînin. Kedkarên Çapemeniya Azad wê nehêlin rastî di tariyê de bimînin, em ê zêdetir li ber xwe bidin û têkoşîna Azîz Koyluoglû bigihînin serkeftinê.’’
