Amadekariyên ji bo 5’emîn Mihrîcana Çanda Kurd a Sînan Dersim a ku wê 21’ê Îlonê roja Yekşemê li bajarê Marsîlya ya Fransayê were lidarxistin, ber bi dawî ve diçe. Komîteya amadekar a mihrîcanê li herêma Parc de la Ravelle (La Rose) a ku wê mihrîcan lê were lidarxistin lêkolîn kir û sererastkirinên dawî di ber çavan de derbas kir.
Ji bo beşdarbûna Mihrîcana Çanda Kurd a ku ji bo bîranîna Şehîd Sînan Dersim tê lidarxistin, bang hatin kirin. Siyasetmedar, hunermend, çalakvan û oldarên Kurd bi rêya medyaya dîjîtal her kesî vexwendin mihrîcanê.
Li ser navê Komîteya Amadekar Mehmet Karayazî, endamê Tev-Çandê Rênas Demhat û li ser navê Meclîsa Jinan a Arîn Mîrkan Heval Arzû di daxuyaniyên xwe de li ser girîngiya mihrîcanê ya ji bo Kurdên li Fransayê dijîn rawestiyan.
Parlamenterê DEM Partiyê yê Rihayê Omer Ocalan, hunermend Rûken Yilmaz û Koma Rojhilat, koroya Tev-Çand, oldar Şêx Murşîd Xeznewî, Mele Şevket û Mele Abdurrahman, Hevserokê FKDK-BF’ê Yilmaz Serhad û Hevserokê Meclîsa Gel a Masîlyayê Veysel Sarikaş bi dîmenên li ser medyaya dîjîtal parvekirin banga tevlîbûna mihrîcanê kirin.
Mihrîcana Çanda Kurd a Sînan Dersim ji bo Kurdên dîasporayê nirxên çandî bidin jiyîn û ruhê hevgirtinê xurt bikin weke çalakiyek girîng tê dîtin.
Komîteya amadekar a mihrîcanê ragihand ku ew li bendê ne ku bi deh hezaran kes ji bajarên cuda yên Fransayê beşdarî mihrîcanê bibin.
