Her çend pêvajoya çareseriya pirsgirêka Kurd bi rengekî aştiyane û demokratîk bidome jî, daraz li ser bingeha hestên li dijî Kurdan tevdigere û biryaran dide. Yek ji van mînakên herî dawî Cemîl Taşkesen e. Daraza ku gotina Rêveberê HDP’ê yê berê yê Misircê û bernamzetê parlamenteriyê yê DEM Partiyê yê Sêrtê Cemîl Taşkesen ku ji Seroka Giştî ya Partiya Îyiyê Meral Akşener gotibû ‘Ev der Kurdistan e’ nepejirand, ji ber parvekirinên li ser medyaya dijîtal ên li dijî texrîbkirina goristanên gerîlayan, bi îdiaya “gef li serokkomar xwariye” 4 sal û 2 meh cezayê girtîgehê da.
Cemîl Taşkesen, beriya ku bê girtin ji ANF’ê re axivî û diyar kir ku sedem ew e ku di sala 2021’an de ji Meral Akşener re gotiye ‘Ev der Kurdistan e’ û got, “Ji ber ku ji bo gotina ‘Kurdistan’ ceza tune ye’, doza kevin wekî hincet nîşan dan û ceza dan.”
Cemîl Taşkesen, anî ziman ku di vê pêvajoyê de erêkirina dosyaya cezayê û biryara girtinê watedar e û got, “Ger pêvajo birêve biçe jî daraz dev ji dijminatiya xwe ya li hemberî Kurdan bernade. Ez Kurd im, erdnîgariya min, jiyana min û hertiştê min Kurdistan e. Dema ku ez vê rastiyê tînim ziman, vê carê di çavê darazê de dibim ‘terorîst.’ Li vê welatê mîna her tiştî pergala edalet û ehlaqê jî hilweşiya. Muxatabê me yê sereke ji bo pêvajoyê Birêz Ocalan e. Ew çi bêje em dipejirînin. Lê daraza desthilatdariya îro bi pêkanînên xwe yên înkarê dimeşin. Mînak di sala 2014’an de Şehîdgeha Herekolê bi kemçe û mircan hat texrîbkirin. Li dijî vê sûca mirovahiyê em bêdeng neman. Ji xwe ev sûcê şer e. Lê mixabin cenderme û leşkerên ku van sûcan pêk tînin ceza nagirin, yên ku nerazîbûn nîşan didin tên girtin.”
Parêzerê Taşkesen Muhlis Dundar, jî dibêje ku hem cezayê girtîgehê û hem jî fermana girtina wî bi lezgînî, neqanûnî pêk hatine û got ji ber vê hem zehmetiyên şexsî û hem jî yên aborî kişandiye.
