Koordînasyona Jin ên Ciwan û Meclîsa Ciwanan a Partiya Demokrasî û Wekheviyê ya Gelan (DEM Partî) encamnameya Desteya Meclîsa Giştî ya 5’ê Tîrmehê û perwerdeya ku di 1-4’ê Tîrmehê de li Amedê bi beşdariya endamên xwe yên ji Kurdistanê û Tirkiyeyê lidar xistin, eşkere kir.
Di encamnameyê de hate ragihandin ku di serî de Pêvajoya Aştî û Civaka Demokratîk rewşa siyasî ya li Kurdistanê, Tirkiyeyê û cîhanê hate nirxandin û plansaziya ji bo dema pêş hate diyarkirin.
Di vê çarçoveyê de hate ragihandin ku Pêvajoya Aştî û Civaka Demokratîk bi înîsiyatîf û keda Rêber Apo gihîştişye qonaxa aştiya pozîtîf û ji bo derbasbûna ji vê qonaxê divê azadiya fîzîkî ya Rêber Apo teqez pêk were.
Di encamnameyê de hate gotin, ji bo pêkhatina Ronesanseke Rojhilata Navîn a ku bi jinûve pênasekirina têkiliyên Tirk û Kurd pêk were, divê qanûnên Welatîbûna Azad û Civaka Demokratîk bi rengê ku rûmeta gelê Kurd binpê neke bêne derxistin û hate ragihandin ku ciwan pêvajoya Aştî û Civaka Demokratîk ji nêz ve dişopînin.
Hate bibîrxistin ku di 27 û 28’ê Hezîranê de di Mîtîngên Azadiyê de yên li Wan, Mersîn, Amed û Stenbolê bi deh hezaran ciwan amade bûn û daxwaza herî mezin a van ciwanan azadiya fîzîkî ya Rêber Apo bû.
Hate destnîşankirin ku ev îradeya bi biryar û zelal a ku ciwanan di Mîtîngên Azadiyê de nîşan dan, di heman demê de karên dema pêş jî raxist pêş çavan.
Li gorî encamnameyê di civînê de ev biryar hatin wergirtin:
“Ji bo daxwaza azadiya fîzîkî ya Rêberê Gelan Birêz Ocalan bi xurtî li Tirkiye û Kurdistanê bê ser ziman çalakî bêne lidarxistin,
Ji bo nuqteyên krîtîk ên Pêvajoya Aştî û Civaka Demokratîk bêne vegotin û ciwan hîn bi bandor tevlî pêvajoyê bibin, li qadan bi ciwanan civîn û kombûn bêne lidarxistin.
Bernameya perwerdeya navendî ya ku 1-4’ê Tîrmehê li Amedê bê lidarxistin li bajar û navçeyan li gorî mercên xweser bêne lidarxistin,
Di 18-19’ê Tîrmehê de li Enqereyê ji aliyê Komîsyona Têkiliyên Derve ya Meclîsa Ciwanan a DEM Partiyê li ser rola ciwanan a di dîplomasiya neteweya demokratîk de komxebatek wê bê lidarxistin.”
