Komeleya Mafên Mirovan (ÎHD) li gelek bajaran ji bo balê bikişîne ser rewşa girtiyên nexweş û parastvana mafên mirovan Hatîce Onaranê daxuyanî da. Di daxuyaniyan de îşaret bi rewşa Hatîce Onaranê hate kirin û hat xwestin demildest bê berdan.
Komîsyona Girtîgehan a Şaxa ÎHD’a Şirnexê li avahiya komeleyê daxuyanî da. Şaxa OHD’a Şirnexê jî piştgirî da. Metna daxuyaniyê ya hevpar ji hêla Hevseroka Şaxa ÎHD’ê Rûken Ustun ve hate xwendin.
Şaxa ÎHD’a Îzmîrê jî bi heman daxwazê li avahiya xwe daxuyanî da. Di daxuyaniyê de pankarta “Bêdeng nemîne, nebe şirîkê sûc” hate hilgirtin. Metna daxuyaniyê ji hêla Şaxa ÎHD’ê Zîlan Gumuş ve hate xwendin. Di daxuyaniyê de hate gotin ku Hatîce Onaran nexweşa penceşêra rûvika stûr e û gelek nexweşiyên wê yên din ên cidî hene. Zîlan Gumuşê, bi domdarî got: “Heke meqamên rayedar tevdîrên pêwîst negirin, dê mafê jiyanê bê binpêkirin. Em carek din bang li rayedarên berpirsyar dikin ku hevala me ya Hatîce û hemû girtiyên nexweş bên berdan.”
Şaxa ÎHD’a Êlihê jî li avahiya xwe daxuyanî da. Pêkhateyên Platforma Ked û Demokrasiyê jî piştgirî dan. Parêzer Halîl Îbrahîm Altunkaynak daxuyanî xwend û got: “Piştî Hatîce Onaran xistin zindanê, kontrol û tedawiya wê bi rêk û pêk nayê kirin, tenduristiya wê nebaş bûye. Di lêkolîna PET’ê ya dawî ya li ser zikê wê de lezyonên (nodul) nû hatin tespîtkirin.”
Şaxa ÎHD’a Sêrtê jî li pêşiya avahiya xwe daxuyanî da. Di daxuyaniyê de pankarta “Mirov bi mafên xwe mirov in” hate hilgirtin û metna daxuyaniyê ji hêla ji rêveberên ÎHD’ê Nezahat Celenê ve hat xwendin. Nezahat Celenê got: “Ev pêvajo bi qasî sê saet û nîvan domiya. Hatîce Onaranê di hevdîtina dawî ya bi parêzerê xwe re de got ku di vê pêvajoyê de cendirme ji wir derneketin û mehremiyeta nexweş binpê kiriye.”
Li Amedê Şaxa ÎHD’ê li avahiya şaxê daxuyanî da. Endama Komîsyona Girtîgehan a Şaxê Esra Saçaklidir metn xwend û bal kişand ser rewşa tenduristiyê ya Hatîce Onaranê.
Şaxa ÎHD’a Dêrsimê li avahiya xwe daxuyanî da û daxuyanî ji hêla Hevseroka Şaxê Nûrşat Yeşîlê ve hate xwendin.
Şaxa ÎHD’a Rihayê jî bi heman boneyê li avahiya xwe daxuyanî da. Metna daxuyaniyê ji hêla Hevseroka Şaxê Songul Arpayê ve hate xwendin. Songul Arpayê got: “Divê serlêdana taloqkirina înfaza Hatîce Onaranê tavilê were qebûlkirin. Divê raporên tenduristiyê yên pêwîst tavilê bên amadekirin û di çarçoveya peymanên hiqûqa navxweyî û hiqûqa navneteweyî de tavilê were berdan.”
