Meclisa Malbatên Şehîdan a bajarê Hesekê ji bo gerîlayê HPG’ê Berxwedan Hesekê (Omer Herdan ê ku 1’ê Nîsana îsal (2025) li herêma Zapê di bersivdayîna êrişên dewleta Tirk a dagirker de şehîd bibû, konê sersaxiyê li taxa Xişman veda û merasîmek li dar xist.
Endamên saziyên sivîl, partiyên siyasî û malbata şehîd jî di nav de bi sedan şêniyan beşdarî merasîmê bûn. Kon bi wêneyên şehîd Berxwedan, wêneyên Rêber Apo û alên Meclisa Malbatên Şehîdan hat xemildanin.
Merasîm bi deqeyek rêzgirtin destpê kir. Piştre endamê Meclisa Malbatên Şehîdan Ehmed El Hêrs axivî û got: “Em sersaxiyê ji xwe û ji malbata şehîd Omer Selah Herdan re dixwazin. Em îro li pêşberî mezinahiya şehîd Berxwedan Hesekê disekinin, lehengê ku tirs û rihetî nas nedikir. Ciwanê xwe da azadiya gelê xwe û rûmeta xaka xwe. Berxwedan yek ji wan kesan bû ku bawerî bi vê yekê anî ku gotin serkeftinê nayîne, lê bi xwînê û fedekariyê tê bidestxistin. Berxwedan dizanî ku rêya azadiyê dirêj û zehmet e, li ser vê yekê bi israr û baweriya bi edaletê dozê meşiya.”
Ji fermandarên Meclisa Leşkerî ya Hesekê Hemîd Cemîla jî anî ziman ku bi ked û xwîna şehîdan planên li dijî Bakur û Rojhilatê Sûriyeyê vala hatin derxistin û got: “Êriş û plan li ser me hatin kirin, lê em teslîm nebûn. Me bi biryardarî û israr berxwedana xwe domand, ji ber şehîdên me li erd û asîman pîroz in. Di dilê me de ne tu carî namirin.”
Di dawiyê de nasnameya şehîd hat xwendin û radestî malbata wî hat kirin.
Merasîm bi dirûşmên dilsoziya bi şehîdan re bi dawî bû.
