Li Amedê bi pêşengiya Şaxa Komeleya Hiqûqnasên ji bo Azadiyê (OHD) a Amedê û bi banga Platforma Ked û Demokrasiyê ya Amedê, li ber AZC Plazayê bi dirûşma “mafê hêviyê tavilê bê bicîhanîn” daxuyanî hate dayîn. Di daxuyaniyê de ji bilî nûnerên partiyên siyasî û saziyên civaka sivîl, gelek kes jî amade bûn û bi awayekî berdewam dirûşma “Bijî Serok Apo” hate berzkirin.
Hevserokê Şaxa OHD’ê ya Amedê Muhuttin Muguç diyar kir ku misogeriya hiqûqî ya vê serdema dîrokî bi bicîhanîna mafê hêviyê pêkan e û got, “Entegrasyona demokratîk a aştiyê jî bi gavên zagonî yên mafê hêviyê û veguherîna wê ber bi azadiyê ve girêdayî ye.” Muguç bang li Komîteya Wezîran a Konseya Ewropayê kir ku bicîhanîna biryarê bi bandor bişopîne; her wiha bang li TBMM, partiyên siyasî, mekanîzmayên dadweriyê û Wezareta Dadê kir ku biryarên Dadgeha Mafê Mirovan a Ewropayê (DMME) û pêşniyarên Komîteya Dijî Êşkenceyê ya Neteweyên Yekbûyî (NY) bicîh bînin. Wî herwisa bang li raya giştî ya demokratîk kir ku hesasiyetê û berpirsiyariyê nîşan bide.
Daxuyanî bi çepik û tîlîliyan bi dawî bû.
LI MERSÎNÊ BANGEWAZÎ
Li Mêrsînê jî bi pêşengiya Platforma Saziyên Demokratîk ên Mêrsînê, li ber avahiya rêxistina navçeya Akdenîzê ya DEM Partiyê daxuyaniya çapemeniyê hate dayîn. Di daxuyaniyê de pankarta “mafê hêviyê tavilê bê bicîhanîn” hate vekirin û metna daxuyaniyê ji aliyê endamê OHD’ê parêzer Bekir Yukselir ve hate xwendin.
Yukselir bi bîr xist ku 11 sal di ser biryara “mafê hêviyê” ya DMME’ê ya derbarê Rêber Apo de derbas bûne û got: “Li Tirkiyeyê hê jî ti rêziknameyek nehatiye kirin. Mafê hêviyê mafekî bingehîn ê mirovî ye û di heman demê de gava herî girîng e ku dê rêya aştiya civakî û siyaseta demokratîk veke. Divê TBMM, partiyên siyasî, mekanîzmayên dadweriyê û Wezareta Dadê tavilê tevbigerin û rêziknameyên ji bo rakirina qedexeya berdanê amade bikin.”
Daxuyaniya li Mêrsînê jî bi çepikan bi dawî bû.
