Ji bo gerîlayên HPG’ê Faruk Kurt (Xemgîn), Medenî Kurt (Azad) û Eşref Keser (Welat) ên ku di dîrokên cuda de şehîd bûne li navçeya Farqînê û ji bo şervanê YPG’ê Ahmet Arcan (Xebat Amed) ê ku di 26’ê Sibata 2015’an de li bajarê Qamîşlo yê Rojava şehîd bû li navçeya Rezan a Amedê merasîmên sersaxiyê hatin lidarxistin.
Merasîmên sersaxiyê yên bi pêşengiya Komeleya Alîkarî û Piştevaniya bi Malbatên Xizmên Xwe li Dergûşa Şaristaniyê Winda Kirin re (MEBYA-DER) hatin lidarxistin, bi girseyî hatin ziyaretkirin. Gelek welatî, partiyên siyasî û rêxistinên civaka sivîl beşdarî sersaxiyan bûn û timî dirûşmeya “Şehîd namirin” hat berzkirin.
Hevseroka MEBYA-DER’ê Gurbet Sevîktek Ari di sersaxiyê de axivî û got, “Bi saya keda ciwanên me, destê Rêberê Gelê Kurd Abdullah Ocalan xurt e. Ji ber vê yekê, em ê xwedî li bîranînên wan derkevin.”
Pişre bi girseyî çûn serdana sersaxiya li navçeya Farqînê ya ji bo gerîlayên HPG’ê hatine lidarxistin. Di serdanê de sersaxî ji malbatê re hat xwestin. Birayê Eşref Keser, Seyîthan Keser di sersaxiyê de axivî û got, “Şehîd Welat ne tenê şehîdê me ye, yê tevahiya gelê Kurd û yê Kurdistanê ye. Em jî ji wî re soz didin. Heta dilopa dawî ya xwîna xwe em ê têkoşîna wan bidomînin. Ez ji vir silavên xwe ji Rêberê Gelê Kurd Abdullah Ocalan û hemû girtiyan re dişînim.”
