Di daxuyaniya DBP’ê de işaret bi şerê li Fîlîstîn, Sûriye û Ûkraynayê hate kirin û hate gotin, “Têkoşîna gelê Kurd ne tenê ji bo azadiya xwe, ji bo jiyaneke bi hev re ya demokratîk û aştiyane ya gelan hemûyan e.”
Hate destnîşankirin ku çareseriya demokratîk û aştiyane ya pirsgirêka Kurd ne tenê ji bo Kurdan, di heman demê de ji bo paşeroja hevpar a Tirkan, Ereban, Lazan, Çerkesan, Elewiyan, Êzidiyan û hemû gelan gelekî girîng e.
Di daxuyaniyê de işaret bi ‘Banga Aştî û Civaka Demokratîk’ a Rêber Apo hate kirin û hate ragihandin ku aştiyeke mayinde tenê bi ewlekirina mafên gelê Kurd, naskirina mafên çandî û perwerdeyê yên bi zimanê dayikê û pêkanîna şert û mercên azad ên Rêber Apo dibe.
DBP’ê got, “Di 1’ê Îlonê Roja Aştiyê ya Cîhanê de banga me ye: Werin em li ber şer û hilweşînê rabin; têkoşîna demokrasî, edalet, azadî û wekheviyê mezin bikin. Paşeroja hevpar a gelan li ser bingeha aştiyê ava bikin. Li hemberî polîtîkayên şer ên ji Rojhilata Navîn belavî cîhanê bûye, em bi hev re aştiyê qezenç bikin.”
Di daxuyaniya nivîskî ya Înîsiyatîfa Yekîtiya Demokratîk de hate gotin, “Di demekê de ku axaftin li ser gefa Şerê Cîhanê yê Sêyemîn tê kirin, dewlet çekên xwe zêde dikin. Di polîtîkayên şer de destketiyên gelan nîne” û bang li gelan kir ku dengê xwe ji bo aştiyê bilind bikin.
Di daxuyaniyê de hate destnîşankirin ku mifteya aştiyê yekîtiya neteweyî ye, ji bo aştiyeke mayinde û bi rûmet jî bang li hikumetê hate kirin ku bi lez gavan biavêje.
