Çalakvana mafên jinan Şede Beşîr li ser rûpela xwe ya medya dijîtal a Facebookê di derbarê bîlançoya qetilkirina jinan li Herêma Kurdistanê agahî da.
Şede Beşîr ragihand ku ji serê vê salê ve 31 jin li Herêma Kurdistanê hatine qetilkirin û got: “Ev hejmar her çend ne fermî be jî, lê amareke rastbêj a herêmî ye. Bêdengbûna li hemberî van sûcan, hevkariya sûc e. Ew civaka ku li hemberî qetilkirina jinan bêdeng bimîne, rê li ber qurbaniyên nû vedike.”
Her wiha da zanîn ku wek jin ne hewceyî gotarên xweşin, ew hewceyî edaletê, bi cihanîna yasayê, cezakirina sûcdaran, parastina jinan û dawîanîna li her cûre bêcezakirinê ne ku jiyana jinan xistiye metirsiyê. Şede Beşîr got: “Her jinek ku tê qetilkirin, ne tenê şikestina malbatekê ye, di heman demê de şikestina hemû civakê ye.”
Çalakvan Şede Beşîr diyar kir ku piştguhkirina dengê rêxistinên jinan û çalakvanan ji aliyên peywendîdar ên hikûmetê ve, valahiyeke mezine û rê li ber sûcên bi vî rengî vedike. Şede Beşîr tekezî kir ku hewcedariya wan bi sozên bêkiryar nîne, ew daxwaza îradeya siyasî û edaletê dikin.
Şede Beşîr herî dawî destnîşan kir ku tiştê divê desthilatdarî bi cih bîne ev e; guhdarkirina rastîn a rêxistinan, bi cih anîna bilez a pêşniyar û projeyasayên ku rêxistinên parastinê di ber mafên jinan de bi salane pêşkêş dikin, bi cih anîna hişk a yasayan bêyî tu cudahiyan, her wiha rawestandina bilez a destwerdanên eşîrî û rêkeftinên siyasî di dadgehan de ku li ser hesabê xwîna jinan tên kirin.
