Hevserokên Giştî yên DEM Partiyê Tulay Hatîmogûllari û Tûncer Bakirhan li Girtîgeha Edîrneyê serdana Selahattîn Demîrtaş kirin.
Hevserokan piştî serdana Demîrtaş li ber Girtîgeha Edîrneyê daxuyanî dan.
Tulay Hatîmogûllari got, “Îro li gel Hevserokê Giştî Tûncer Bakirhan me serdana Selahattîn Demîrtaş ê dilovan kir. Em ê ji vir jî biçin Kandirayê û serdana Fîgen Yuksekdag û Semra Guzel ên dilovan bikin. Di serdana xwe ya îro de me Hevşaredarê xwe Selçûk Mizrakli jî ziyaret kir. Gelekî silav li civaka Tirkiyeyê kirin. Silav û hezkirinên xwe pêşkêşî her kesî kirin ên ku li wan pirsîn. Rewşa wan a tenduristiyê gelekî baş bû, moralê wan bilind bû û hêviya wan a ji bo aştiyê jî gelekî zêde bû.”
Tulay Hatîmogûllari bi dewamî anî ziman ku hevserokên wan ên di 4’ê Mijdarê de bi operasyoneke berfireh hatin binçavkirin û got, “Bi wê operasyonê re Tirkiye ber bi tarîtiyê ve hate ajotin. Girtina wan 10 sal li pey xwe hişt. Li gel biryara Daîreya Mezin a Dadgeha Mafên Mirovan a Ewropayê (DMME) hîn jî girtî ne. Ti sparteyeke vê ya hiqûqî nîne. Qanûnên heyî yên li Tirkiyeyê û destûra bingehîn a heyî tê binpêkirin.”
Tulay Hatîmogûllari destnîşan kir ku hevalên wan careke din bi peyamên xwe destnîşan kirin ku ew heta dawiyê piştgiriyê didin pêvajoya aştiyê û got, li şûna li girtîgehê li nava çar dîwaran, divê li derve bi wan re tevkariyeke mezin li avakirina civakî ya pêvajoya aştiyê bikin û azad bin.
Di dawiya axaftina xwe de Tulay Hatîmogûllari got, “Biryara DMME’yê divê bi lez bi cih bê anîn. Selahatrtîn Demîrtaş, Fîgen Yuksekdag û hemû girtiyên ji Doza Kûmpasê ya Kobanê divê bi lez bêne berdan. Ev yek wê tevkariyeke mezin li pêvajoya aştiyê bike. Divê hevalên me bi rengekî serbest îro karibin li pêşberî çapemeniyê bi we re biaxivin. Di vê mijarê de êdî rewşeke bendemayinê nemaye. Biryar divê bi lez bi cih bê anîn.”
Hevserokê Giştî yê DEM Partiyê Tûncer Bakirhan jî got, “Eger em bi rastî pêvajoyekê dimeşînin, ji vê pêvajoyê bawer dikin, ti wateya xwe hîne ku hevalên me yên ku karibin tevkariya herî mezin li vê pêvajoyê bikin li girtîgehê li hucreyê bêne ragirtin. Em di wê baweiryê de ne ku hevalên me, Hevserokên me wê karibin tevkariyeke mezin li vê pêvajoyê bikin. Cihê wan êdî ne hucre ye, ne girtîgeh e, cihê wan gel me ye. Ji bo bi me re vê aştiyê civakî bikin divê bi lez bêne berdan.”
Hevserokên Giştî yên DEM Partiyê piştre ji bo karibin Fîgen Yuksekdag bibînin derbasî Girtîgeha Kandirayê bûn.
