Komîteya Gel û Baweriyan bang kir ku di Cejna Qurbanê de bi xurtî xwedî li şehîdan bê derketin, bi girseyî serdana şehîdgehan bê kirin û piştgirî ji malbatên şehîd û girtiyan re bê dayin.
Komîteya Gel û Baweriyan bi wesîleya Cejna Qurbanê peyamek weşand û hêvî kir ku gelên Misilman bi hesta xwişk û biratiya ummetê ya Mûhammedî Îslam Cejna Qurbanê bê pêşwazîkirin. Komîteyê xwest, ev Cejna Qurbanê jî bibe wesîleya têkoşîna hevpar a maf û edaletê, xurtkirina parvekirin û piştevaniyê, pêşvebirina xwişk, biratî û dostaniya navbera gelan û got, “Em Cejna Qurbanê li gelên Misilman pîroz dikin. Kesên ku bi nêta hecê ne ku yek ji şertên Îslamê ye, hêvî dikin ku heca wan bê qebûlkirin.”
BI HÊVIYA SERKETINA KEVNEŞOPIYA ÎBRAHÎMÎ
Komîteya Gel û Baweriyan destnîşan kir ku wateyeke kûr a pîrozkirina cejnan heye ku ruhê yekîtiya demokratîk ê gelan bi pêş ve bibe, têkiliyên xwişk, biratî û dostaniya mezin di nava gelan de xurt bike, li gorî kevneşopiyên civakî bê pîrozkirin û got, “Pîrozkirina Cejna Qurbanê li hemberî zalimên weke Nemrûd û Fîrewn ku xwe xistin şûna xwedê, bû wesîleya serketina kevneşopiya Îbrahîmî. Li Rojhilata Navînn beriya bi hezaran salî ji ezmanan beranek ji bo qurbankirinê hate şandin, bi vî rengî pêşî li qurbanîkirina mirovan hate girtin, lê belê li gel cejneke bi vî rengî ya xwedî wateyeke civakî û dîrokî jî her roj bi dehan mirov hîn jî têne qurbankirin. Netewe dewletên ku dixwazin serweriya xwe ava bikin, desthilatdariya xwe xurt bikin, berpirsyarê sereke yê vê yekê ye. Netewe dewlet ji bo karibe li vê xakê serweriya xwe biparêze, mirovan dike qurban. Di heman demê de li ser vê xakê kevneşopî, sekn û berxwedana Îbrahîmî jî ti carî kêm nebû. Di vê cejnê de ya ku herî zêde divê em li ser bifikirin ew e ku çawa dikarin hêjayî vê kevneşopiyê bibin. Lewma em ji gelên Rojhilata Navîn hêvî dikin ku bi ruhê cejnê û baweriyeke mezin pêvajoya ‘Avakirina Civaka Demokratîk’ pêşwazî bikin. Ji ber ku pirsgirêkên heyî yên civakî pêwîstiya xwe bi çareseriya bingehîn heye, kar û têkoşîna bi vê wateya mezin wê bi qasî îbadetê karekî xêrê be.
DIVÊ EM BI BAWERÎ, BIRYARDARÎ Û YEKÎTIYÊ SEKNEKÊ NÎŞAN BIDIN
Em di wê baweriyê de ne ku paşeroja Rojhilata Navîn wê li ser bingeha demokratîk a rastiya Kurd de pêk were ku xwedî hişmendiyeke kûr a hebûn û azadiyê ye. Bi paradîgmaya neteweya demokratîk re wê avaniya civakî exlaqî, polîtîk û azad a gelên Rojhilata Navîn di nava şert û mercên heyî de pêk bîne, ‘Avakirina Civaka Demokratîk’ bi cih bîne. Em di wê baweriyê de ne ku şer, krîz û kaosa li Rojhilata Navîn bi destê netewe dewletan hatiye afirandin, wê bi Konfederasyona Gelan a Rojhilata Navîn a mezin ji holê bê rakirin ku li dora vê paradîgmayê bi pêş dikeve. Ji bo pêkhatina vê jî pêwîstî bi sekneke bi bawerî, wêrekî, bi biryar û yekîtiyê heye. Karê herî bi xêr ê cejnê wê xurtkirina yekîtiya me û gelên her^êmê be.
PIŞTEVANIYA BI SERDAN Û XÊRÊ
Di vê Cejna Qurbanê de divê em hîn bi xurtî xwedî li şehîdên xwe derkevin, bi rengekî girseyî serdana şehîdgehan bikin. Bi serdana girseyî ya li malbatên şehîd û girtiyan, divê em piştevaniya xwe nîşan bidin. Em bi bîr dixînin ku xêra ji bo xizanên Kurdistanî, xêra ji bo gelên li Rojava û Sûriyeyê yên di bin êrîşê de ne, wê bibe xêreke mezin.
Weke tevger em bi vî fikrî û van hestan Cejna Qurbanê li we pîroz dikin û bang li her kesî dikin ku ji bo ‘Avakirina Civaka Demokratîk’ bixebitin. Em hêviya xwe careke din tînin ziman ku cejn aştî, edalet, xwişk, biratî û azadiyê ji gelan re bîne. Em bang li gelên xwe yên li herêmê dikin ku li eniya demokrasî û azadiyê têbikoşin. Bi wesîleya cejnê em li pêşberî bîranîna şehîdên xwe hemûyan bi hurmet û minet bejna xwe ditewînin. Em soza xwe dubare dikin ku daxwazên azadî û demokrasiyê yên gelê Kurd bi serxistina ‘Avakirina Civaka Demokratîk’ bigihînin serketinê. Em careke din Cejna Qurbanê di serî de li gelê Kurd li hemû gelên Misilman û gelên Rojhilata Navîn pîroz dikin.”
