Li bajarê Hesekê yê Kantona Cizîrê, ji aliyê Kongra Star û Civata Jinên Zenûbiya ve konferansek bi navê “Yekitiya Jinan, Bingehê Avakirina Dad û Demokrasiyê ye li Sûriyeya Nenavendî û Yekgirtî” hate lidarxistin. Di konferansê de hate destnîşankirin ku azadiya jinê bingeha azadiya civakî ye û bêyî beşdariya jinan di mekanîzmayên biryargirtinê de demokrasiyeke rastîn nayê avakirin.
JI BO DEMOKRASIYÊ YEKITIYA JINAN PÊWÎST E
Suheyla Senouh a ku li ser navê Encûmena Jinên Sûriyê axivî, diyar kir ku ev konferans ne bûyereke asayî ye, lê qonaxeke girîng e ku nîşan dide jin dikarin li Sûriyê ji bo demokrasî û azadiyê di her qadê de têbikoşin. Senouh, anî ziman ku jin di asta neteweyî de bi meclîs û navendan hatine bihêzkirin û got: Jin li dijî tundî û paşguhkirinê, di asta siyasî û civakî de têkoşîneke rastîn dimeşînin.
HÊZDARKIRINA JINAN PÊŞEROJA CIVAKÊ DIYAR DIKE
Nûnera Encûmena Jinên Şam û Sûriya Başûr Sebah Şabo, ragihand ku bihêzkirina jinan ne tenê daxwazek e, lê mijareke ku pêşeroja hemû civakê diyar dike ye. Sebah wiha axivî: “Jin bingeha civakê ne. Bihêzkirina wan, li ser bingeha dad û wekheviyê rê li ber avakirina serûberiyeke civakî ya nû vedike.” Wê herwiha bal kişand ser ku jin di mekanîzmayên biryargirtinê de bi têra xwe nayên temsîlkirin û got divê perwerde, maf û pozîsyonên wan ên siyasî bên misogerkirin.
AZADIYA JINAN AZADIYA HEMÛ GELAN E
Kolî Cafo ya ji Yekitiya Jinên Êzidî diyar kir ku azadiya jinê tê wateya azadiya hemû gelan. Cafo, anî ziman ku têkoşîna jinên Êzidî ji bo parastina çanda xwe mînakeke mezin a berxwedanê ye û wiha got: Li Şengalê û bi gelên din ên bindest re hevgirtin, navenda têkoşîna jinan e. Jin divê bêyî cudahiya nasnameya etnîkî yek bin.
HEKE JIN NEYÊ PERWERDE KIRIN, CIVAK WÊ PAŞ DE BIMÎNE
Di rûniştina dawî ya konferansê de xwendekarên Dûrzî gotin ku jin kevirê bingehîn ê civakê ne. Xwendekaran gotin: Heke jin ji perwerdeyê bêpar bimînin, hemû civak paş de dimîne. Perwerde ne tenê jinan, lê hemû civakê pêş ve dibe. Hate destnîşankirin ku rakirina astengiyên li pêş perwerdeya jinan, wê geşepêdana giştî ya civakê misoger bike.
