Meclîsa Jinên Brîtanyayê di sêyemîn salvegera qetilkirina Jîna Emînî de li Londonê çalakiyek bîranînê ya mezin li dar xist. Bi sedan çalakvanên jin ên ji gelên cuda û têkoşînê dimeşînin qada çalakiyê tijî kirin.
KOMUNA JÎNA EMÎNÎ HAT RAGIHANDIN
Di axaftina vekirinê de hate gotin ku çalakî wê her sal were lidarxistin û hate ragihandin ku Komuna Jîna Emînî cara yekem li Sheffield ê Brîtanyayê hat damezrandin û di serdema pêş de wê li deverên cuda komunanên nû werin vekirin.
LI SER GIRÎNGIYA TÊKOŞÎNA AZADIYÊ YA JINÊN KURD SEKINÎN
Meclîsa Jinan a Jiyan koka dirûşmeya “Jin, Jiyan, Azadî” û girîngiya wê ya di têkoşîna azadiya jinên Kurd de vegot. Meclîsê diyar kir ku serhildana piştî qetilkirina Jîna Emînî ji bo jinên li çar aliyê cîhanê bûye qîrînek kolektîf. Meclîsê daxwaza demildest berdana çalakvanên jin Werîşe Mûradî, Pexşan Ezîzî û Şerîfe Muhammedî yên ku rejîma Îranê cezayê darvekirinê li wan hatiye biriye, kir.
Nivîskar û çalakvana Îranî Meryem Nemazie anî ziman ku têkoşîna “Jin, Jiyan, Azadî” projeyeke mirovahî rakir ser piyan e û bal kişand ser zilma ku jinên li Îran, Efganistan, Xeze û Tirkiyeyê pê re rû bi rû dimînin û bi bîr xist ku şoreşa jinan jehrkujiya li dijî hemû rejîmên otorîter e.
Çalakvana Rojhilatê Kurdistanê Mehrî Rezaî kokên dîrokî yên Tevgera Azadiya Kurd şîrove kir. Rezaî diyar kir ku wan ji şoreşa jinan a li Rojava îlham girtine û anî ziman ku piştî Jîna Emînî, gelên Îranê ji bo parastina azadiya xwe berê xwe dane tecrûbeyên Rojava.
Nivîskara femînîst û akademîsyen Natasha Walter bal kişand ser têgihîştina jinên Kurd a azadiyê ya li ser bingeha têkoşîna kolektîf ku berevajî femînîzma takekesî ya li rojava ye. Walter bi dirûşmeya “Jinên yekbûyî wê ti carî têk neçin” dawî li axaftina xwe anî.
Bijîşk û çalakvana Tamîlî Shirona Jude-Manorajh berxwedana jinên Tamîlî ya li dijî qirkirinê, windakirinên bi darê zorê û tundiya cinsî vegot. Shirona Jude-Manorajh got, “Azadiya jinan nabe mijara bazarê” û banga mezinkirina tevgera jinan a kurevî kir.
Endama Yekîtiya Jinên Iraqê Noûra Sabrî jî bal kişand ser êrîşên Îslama siyasî yên li ser mafên jinên li Iraqê. Noûra Sabrî li dijî hewldanên rewakirina zewaca zarokan hişyarî da û got, “Dema ku jin tên bêdengkirin, nîvê civakê bêdeng dibe û pêşketin pêkan nabe.”
Çalakvana Efganî Dewa Khan qala berxwedana li dijî rejîma Talîban a ku jinan ji perwerde û jiyana civakî dûr dixe, kir. Dewa Khan got, “Hevgirtin ne tenê gotin e; çalakî ye. Em dikarin bi hev re cîhanek ku tê de jin ji azadiya xwe bêpar nemîne, ava bikin.”
HEVGIRTINA HUNER Û MUZÎKÊ
Hunermend Freny Pavrî helbesta ji bo Jîna Emînî nivîsandiye xwend. Freny Pavrî di helbesta xwe de ruhê “Jin, Jiyan, Azadî” anî ser dikê. Temaşevanan bi Sûna Alan re stran gotin û hol veguherand koroyek bi coş. Hunermand Sara Fotros û balyoza navneteweyî ya çanda Ukraynayê EKA | Bandura jî derketin ser dikê.
Îsal cara yekem çalakiya bibîranînê hate lidarxistin û ji aliyê beşdaran ve bi coşeke mezin hate pêşwazîkirin. Meclîsa Jinan a Jiyanê ragihand ku ev gavên li Londonê dê li bajarên din ên Brîtanyayê jî belav bibe û biryardariya mezinkirina têkoşîna hevbeş a jinan dubare kir.
Çalakî bi daxuyaniya dawî ya bi sernavê “Sozek ji bo Hemû Jinên Cîhanê” bi dawî bû. Jinan diyar kir ku têkoşîna wan sînoran nas nake, ew ê bi hev re bilind bibin û qet teslîm nebin.
Di daxuyaniyê de wihanhat gotin:
“Jin, di nava xwe de îfadeya herî bilind a hêza civakî, hevgirtinê û jiyanê hildigirin. Ji bo hurmetkirina vê rastiyê em soz didin: Em ê şoreşa jinan hîn bi hêztir, kûrtir û ji tevna civakê nayê cihê kirin bikin. Têkoşîna me bi sînoran, sînordar nabe. Şoreşa jinan, divê li her derê bi têkoşîna berfireh a ji bo azadî, demokrasî û dadê bi hev re, rê ve biçe. Tenê bi yekîtiya jinan, gelan û têkoşînan azadiya rastîn pêkan e.
Em ji hemû xwişkên xwe yên cîhanê re soz didin: Em ê bi hev re serbikevin, bi hev re şer bikin û qet teslîm nebin. Em ê zincîrên baviksalariyê bişkînin, dîwarên serdestiyê hilweşînin û ji bo azadî, wekhevî û rûmetê, ne xewn lê rastiyekî ava bikin. Ji bo her jineke bêdengkirî, bi hezaran dê biaxivin. Ji bo her jiyana ku hatiye standin, bi mîlyonan dê ber bi pêş ve bimeşin.
Em vê yekê her jina berxwedêr, her hevrêya ku jiyana xwe ji dest daye û nifşên pêşerojê re deyndar in. Em ji xwişkên xwe yên li her derê re soz didin: Sîstema baviksalar wê bi ser nekeve. Derewên wê, tundiya wê û serdestiya wê, dê bi hêza bêrawestan a jinên bi hev re rabûnê re parçe bibe.
Ji hemû jinên cîhanê re: Em hebûn, em hene û em ê hebin. Em ê bi we re bi ser bikevin, bi we re şer bikin û heta şoreşa jinan bibe şoreşa mirovatiyê, em ê qet nesekinin.
Jin, Jiyan, Azadî.”
